做人訪，最怕剛踏足社會的二字輩，見識閱歷紙咁薄，就算扭盡六壬，文稿還是味太淡。生於八三年的伍仔或許是異數，小時候在電視目擊張國榮遭粉絲包圍而避走車頂，這幕令他矢志要紅；會考零分讀毅進，畢業後迂迴多年夢未圓，竟因一次擺陣，到無綫當特約演員，再當上吳雨霏MV男主角，今年自編自導自演系列網片《大食女友》上載五天達百萬點擊，成新一代巴打偶像。
撰文：蔡俊業
攝影：蔡家輝、蔡倫斯
「睇樣，就知你係壞仔啦」
要說伍仔，得從頭由他的血統開始。爺爺原籍肇慶，有新疆血統；外公為潮州人，卻是印度溝新加坡混血兒，伍仔愛扮愛演，與他略有淵源：「聽阿媽講佢以前係大戶人家，喺潮州做老倌，佢好鍾意做戲，就算將家當賣晒都要完成夢想，但來到香港之後做咕哩，搵食嘛，就無再演。」有其父必有其女，「阿媽細細個就識唱歌，都係呂珊嗰啲舊式流行曲。」難怪伍仔決定投身做演員，母親從無阻撓，嘮叨的，是父親。「我哋性格太唔同，佢做嘢循規蹈矩，我就唔想安安份份做個普通人，比較搏，最初入行，佢都叫我正正經經搵份工，話做人要穩定，要買層樓。」於柴灣長大，學生時代已與別不同。「小學讀精英班、做班長、考第一，唱歌就一定攞A，參加數學比賽又攞冠軍；中學就運動標青，籃球、足球都係校隊。」這不是更有學界萬人迷風範嗎？實情是不懂打扮，活脫脫宅男一名，發憤打波很大程度上基於沉迷運動能改變宿命。但「整個中學時期，我都俾老師針對。」高中一次體會，更令他驚覺原來並非所有老師都是「好人」：「Lunchtime去機舖打機，身上有陣煙味，訓導老師捉咗我哋出嚟同班主任講：『睇你個樣，就知道你係壞仔啦！』嘩，老師唔係有教無類咩？自此我就唔再鍾意呢個人，咪無心機讀書，甚至有幾科無考。」結果放榜日派成績單，得零分。他覺得是香港教育制度出問題，埋沒天份。「我絕對係讀書材料，記性好，邏輯強，但有啲科目我點解要讀呢？π（圓周率）、微積分學嚟做咩？識加減乘除就夠，呢啲知識喺社會上用唔着，做咩要嘥我時間！要喺世界上搵錢，你可以學剪頭髮，學整機械，（生物堂）要去學劏青蛙真係好白癡！香港教育制度只適合小部份人，教出一班奴性好強嘅人出嚟！」
第一個奇蹟：家丁阿一
中學時代遭制度「遺棄」，卻原來為日後當演員鋪路，柳暗花明，那個地方叫「毅進課程」，其中一科叫「語言才藝證書課程」，伍仔只見到「表演術」三個字便決定報讀，背後竟然跟張國榮有關。「細個好鍾意佢，覺得佢好威，我唔係睇表演節目，係有次睇新聞，唔知佢喺咩地方俾Fans包圍，要擒上車頂，我覺得呢個人好風光，好想好似佢咁，細個都有幻想過做明星！」課程中，在導師眼中的伍仔，不再是昔日班主任口中的「壞仔」，而是有潛質的演員，「中學除咗打波，真係無咁樣俾人讚過，令我有番自信！」02年畢業，本可入讀演藝學院，他卻自恃青春而放棄，「讀演藝，畢業時已差不多24歲，既然老師都覺得我有Potential，不如出去闖，去咗海洋公園哈囉喂扮鬼，飾演貓精靈。這次扮演，認識了雜誌記者和音樂人等，開啟伍仔往後十年起起伏伏的演藝大門，其間回到演藝修讀短期課程，後來參演電影《蟲不知》，飾演摔角手，繼而兩度在陳木勝執導的《保持通話》和《男兒本色》扮演警察，同一時間，他是全職私人健身教練，後又轉去做商場的冷氣機房管理員，只因當時的同居女友想他做一份穩定工作，「我有試過做，但過唔到自己，想做戲又入唔到行，就好搞笑咁喺機房祈禱。」點知兩星期後，收到TVB的電話，問他有沒有興趣做演員，嘩，上帝顯靈？其實是同居女友私底下將履歷寄到TVB應徵場務，卻因為有演出經驗而就曲折地成為特約演員，第一套劇就是《鐵咀銀牙》，飾演陳夢吉的家丁阿一，20集中17集有戲有對白，很不錯。
第二個奇蹟：MV男主角
往後機會是有的，但多數都是做飛仔，早前《真相》第2集就飾演茶餐廳侍應，亦拍過不少劇集宣傳片，但星途黯淡依舊。某天第二個奇蹟出現，他在電視城化妝間，聽到有位高人教某位知名花旦擺陣催旺事業，「係將九個銅錢放入一個花樽嘅水入面，擺喺桃花位，聽完之後就心諗不如返去試吓先，兩日之後就竟然有人搵我做MV男主角，是吳雨霏的《最後一秒鐘》。」幾分鐘的MV，只見他在鏡頭前拳來拳往，樣貌不太清楚，不過總算升呢做男主角，但真正成為「男主角」的，是往後參演網絡短片，先加入VDONEXT，最爆者就是陳志雲遭廉署拘捕後，在黐笑台扮「陳自焚」開記者會，得啖笑，但扮得似，在這裏經常與導演十哥合作，後來goyeah.com開幕，十哥過檔，負責「兩性之間」的節目，便邀請伍仔幫手做主持，「我唔識做主持，第一集我講第一個字就NG，我只係識做戲，我就去『飾演』主持。」一星期一個題目，集集角色不同，後來不只演，還編，與十哥創作，第一套是《夜場小姐》，自編自演後，以三集《大食女友》最經典，五天在YouTube錄得過百萬點擊，在巴打界人氣急升，千里馬總算遇上伯樂。「唔係咁多人有呢種氣量，去包容一個仔，接受我嘅意見，同畀我去創作，所以我好多謝十哥！」談演戲，談恩師，他眉飛色舞，又帶點自負。
「嗰條路先係你！」
人生豈會永遠順利平坦？隨十哥調離「兩性之間」節目，伍仔在goyeah.com的工作暫時告一段落，偶爾只會參演《蘋果日報》副刊短片，嚴格來說，距離「大紅」的級數還很很很遠，甚至根本未起跑，但他已立定心志，往明日喜劇之星的目標出發，都是十哥對他的啟發，「我之前同佢講，叫佢唔好再搵我拍啲咁戇居嘅角色啦，佢教我：『你想扮靚仔都無人睇，唔係唔得，不過唔係一定要睇你，你梗係要做一啲人哋做唔到嘅嘢，嗰條路先係你！』例如他在副刊「家宅男女」的《下女》系列扮演鹹濕主人，入型入格。「唔係鹹濕，只係用一個卡通方法去演，星爺話，人家覺得有趣嘅喜劇係睇緊真人喺度演卡通片，我呢啲叫可愛！」沒戲做時，就會當風水師，緣起就是當年跟某花旦有樣學樣擺陣成功，是自行研究，一邊看蘇民峰的《風生水起精讀班》學面相，另一邊則看《易經》，主攻梅花易數（易學占卜）。「跟《易經》好有緣，有日見到本書教八卦，睇完之後我就攞嚟試占卜，特別問一啲好罕有嘅嘢邊度有得賣，好準，碟仙咁準，問到第三個卦，叫『蒙卦』，卦象解釋係你唔信就唔好再問，睇到真係打冷震。」訪問完結後，才發現忘了問他可有為將來事業占卦，因為確實想知道最後答案是「大紅大紫」還是「半紅不黑」。
