當挑選了一個合心意的耳機後，如何才可讓耳機充份發揮呢？除在音源、線材方面着手之外，配搭耳擴（音色放大器）推動及提升音質，亦係唔少發燒友嘅秘技之一。有耳機教父之稱嘅Mingo，不但認為耳擴重要性毋庸置疑，而且高級貨全部都好有個性，人聲、低音都有偏好特色，仲要睇埋同耳機夾唔夾，想發揮靚聲原來大有學問。
記者：許福合
攝影：楊錦文
Model：Kimberley@PureModels
高級耳機靠佢推
巿面上耳機種類同款式都有不少，價錢由幾十蚊到上萬都有，是否都需要配搭耳擴呢？有「耳機教父」之稱的Mingo，就認為有質素的耳機才值得花錢配搭耳擴。一個好的耳擴，放大音色細緻度外，更兼顧優化作用，若為平價劣質耳機硬配耳擴，只會將瑕疵凸顯出來，醜上加醜！
Mingo仲提到想要耳機同耳擴都有好發揮，音源質素非常重要，尤其係部份MP3機同手機，製造時只考慮到一般耳機的輸出，若用家使用貴價兼阻抗較大的耳機，就會遇到「推唔郁」情況，須外加耳擴了。Mingo就教大家判斷耳機夠唔夠力推：假設耳機音量分成10段，以音量9試聽時，如有不清楚情況，就算是推不起，若在音量3-4段時仍可清晰聽到音樂細節，就叫夠力推得起。
教父愛人聲細緻
BursonAudioHA-160D是Mingo最愛的耳擴之一，雖然推力不算好高，但優點是人聲細緻，高頻潤滑，對於高質耳機都好易推動，如Audio-TechnicaATHW-5000呢類高級耳機，都有令人滿意表現，即使面對出名難推嘅BeyerdynamicT1耳機，一樣有不錯的發揮。
音色特點：細緻度高，低音收得特別快。
頻率：5Hz-35kHz
輸出：650mW/300Ω
藍光金字塔
除咗教父最愛嘅HA-160D，現場中最吸引筆者嘅，首推呢款外形貌似金字塔嘅Orpheus，特別之處係上半部份是精密耳擴元件，下半底座則是電源部份，目的是抑制共振，避免音色受到影響。Orpheus採用2支膽，啟動後近塔頂會發出藍光，相當特別。
音色特點：音色較「軟」，無明顯偏向，較為平均。
頻率：20Hz-30KHz
輸出：500mW/20Ω
聲底各有不同
儘管耳擴款式眾多，不過Mingo話揀耳擴同揀耳機一樣，都要睇吓夾唔夾。事關耳擴好有個性，有不同「聲底」，有些音色會清徹啲，有些就低音重，有些就適合聽人聲，完全視乎個人口味。隨住流動播放器普及，耳擴亦有流動式，相比家用耳擴針對人聲、弦樂為主，流動耳擴一般會較為平衡，低音較多，比較適合流行音樂的大眾口味。挑選耳擴除了款式，亦可留意規格上頻率及輸出功率，不過Mingo強調，都係要親耳聽過才可作準。
教父推介
流動類
換Chip調聲
iBassoPB2特別之處，係可以按喜好更換Chip，從而改變音色偏向，近似玩膽機。
音色特點：整體相當平衡，適合聽人聲樂曲，同時亦有一定低音。
頻率：10Hz-150kHz
輸出：2,500mW/32Ω
音色高貴
雖然設計以流動為主，但荷蘭品牌的iQubeV1，即使放在家中使用，亦算交足貨，尤其人聲與古典就最理想。
音色特點：音色平衡，聽落會有種高貴的感覺。
頻率：20Hz-20kHz
輸出：160mW/16Ω
木製機殼
用上木製機殼，體積略為大部，但觀感與別不同。內置Gain增益，可提高輸出。
音色特點：音色偏向美式粗聲，Rock味重節奏感強，低頻亦足。
頻率：15Hz-30kHz
輸出：100mW/45Ω
家用類
孖頭輸出
特別之處，係可同時接駁2個耳機聽歌，對部份發燒友會相當好用，可隨時因應樂曲轉換耳機，當然亦可享受與另一半聽歌的樂趣！
音色特點：算係無乜性格，較平衡的音色，即使用上日或德製耳機，變化都不大。
頻率：20Hz-20KHz
輸出：500mW/32Ω
T1專用
對於BeyerdynamicA1耳擴，發燒友一般都只會拿來與同廠的T1耳機配搭，顯然廠方都心知T1難推，所以A1明顯為T1而調校，不過正因為這個特別設定，A1又與其他耳機不大夾，變相成為T1「專用」耳擴。
音色特點：配合T1，A1聲底適合聽古典音樂，屬於爆唔起的一類。
頻率：1Hz-100kHz
輸出：100mW/600Ω
中檔之選
英國品牌，音色不俗，是中檔耳擴一個好選擇，雖然爆發力不算高，但配合一般耳機，優化效果亦唔錯。
音色特點：聲音柔和，適合聽人聲為主的樂曲。
頻率：15Hz-75kHz
輸出：110mW/32Ω
好推德貨
作為德國品牌，相信唔少發燒友已經加咗分，雖然外表平凡，但相當好推，留意輸入方面使用平衡插頭，一般Studio亦適合使用。
音色特點：音色輸出非常好，即使面對T1或HD-800等難推耳機，效果亦不錯。
頻率：5Hz-40kHz
輸出：530mW/600Ω
查詢：亦軒（27706919）