上星期睇波，巴塞隆拿對馬德里體育會，大勝五比零，美斯踢到出神入化，直闖對方禁區，予取予攜，單槍匹馬足以殺敵！對手後衞見之喪膽，直情好似木人巷啲木人，唔識移動身軀嘅，美斯話過就過，如此球星，幾時曾得一見，比利時代，冇乜電視轉播，唔知威成點，馬勒當拿喎，印象中似與Ｃ朗拿度差不多，冇美斯咁發癲噃。
美斯佢頂尖頂呱呱，佢踢到似球神，應與佢嘅巴塞隊友有關，有韋拿在左右配合走位，有沙維、恩尼斯達在後傳送，美斯可以完全放心進攻，無供應不及之憂，今季更有童年拍檔法比加斯回歸，與佢心靈相通，兩人走位配合，妙到毫巔，睇嚟今季巴塞又係所向披靡，皇馬難做攔路虎。
巴塞號稱係地上最強球隊，有其特別風格，究竟呢種風格係乜？我地識睇唔識講，不如聽吓專家意見。意甲羅馬隊今年換老闆，美國人、波士頓紅襪棒球隊嘅一位股東ThomasDiBenedetto（呢個係意大利姓），買起咗羅馬球會，新人事有新作風，聘用咗巴塞前球星、過去三年係巴塞Ｂ隊教練嘅安歷基LuisEnrique做羅馬教練，決心將羅馬巴塞化，一般人以為羅馬金童托迪，十三歲就在羅馬，今年已三十五歲，會反對安歷基，但托迪踢波多年，知道唔改變就冇前途，帶領全體球員宣佈向安歷基效忠，全面支持改革。
據前AC米蘭教練沙基講，意大利球員嘅想法係直線嘅。取勝之道係將個足球以最快時間踢到離自己龍門最遠、離對方龍門最近，但巴塞哲學係橫線嘅，球員要盡量利用球場闊度，好有耐性咁保持足球在己方，橫傳至對方出現漏洞先至直線滲入，若一旦失球，就要全方位壓迫對方嚟搶番皮球，換言之，球員要有相當體力先至可以踢足全場，唔似得托迪咁，素來係有波在腳就精神，失波之後就行行企企。巴塞踢法知易行難，曼聯領隊費格遜爵士學得快，今季立即以緊逼作風防攻，高速攻門，盡量使用快捷新兵，老人家留在後備席上。可惜，曼聯球員腳法稍遜，今季仍然難以扳倒巴塞。