2012年紅館檔期爆棚，潮人黃偉文（Wyman）2月也殺入紅館，以首個填詞人身份在紅館舉行歷年作品演唱會，請來20個歌手上台唱盡18年作品。身為時裝精、買物王的Wyman，更會將時裝元素融入演唱會中，早前拍攝海報已有400萬Valentino靚裙助陣，開一個視、聽大滿足的個唱。
潮人黃偉文入行18年，他將於明年2月以填詞人身份在紅館開第一次個唱。Wyman昨日承認個唱可能是此生唯一，因很怕欠人情債。
趁最紅最靚開
Wyman說：「我屋企人問我要唔要開一次演唱會，如果開，就最好呢幾年，因為啲歌手朋友全部係最靚、最紅、狀態最好嘅時候。當然，到我七老八十先開，我相信65歲嘅容祖兒，同20年後嘅何韻詩都會出嚟幫我唱，但作為合照留念又好，開大party又好，點解唔家做，要等到大家皺晒皮、唔夠氣先唱？」
個唱定於明年2月8日開始，暫定先開兩場。一晚大約會有20個歌手上台，全部原汁原味獻唱Wyman18年來為他們寫的作品，每晚鐵腳包括容祖兒、黃曉明、薛凱琪、何韻詩等，鄭秀文和陳奕迅等則視場次出席。Wyman近年更為人熟知，是他的潮人、時裝人身份，其演唱會也將會是一個雲集topbrand的時裝王國騷，他說：「演唱會時裝呢部份，係搵唔同名牌，每個歌手着一個品牌，例如容祖兒inChanel咁。」
日前Wyman召集好友歌手拍攝海報，已經出動眾superbrands如Chanel、Gucci等，Valentino更專程運了價值400萬的高級訂做服來港，他說：「真係嚇到死，又好感動，因為啲裙真係好靚，但又好fragile，一路影一路驚。」
自任MC講古仔
Wyman表示演唱會上，自己會做MC講古仔，至於可會唱埋一份，自言爛聲的他說：「未夠信心，不過Deanie姐（葉德嫻）好好人，佢介紹咗個語言治療師畀我，之後仲send咗個電郵畀我只寫住：『youcansing！』真係好感動。」
採訪：林妙萍