噚日深圳中航（161）慶祝母公司注資，成功踏出將中航國際整體上市嘅第一步，喺金鐘港島香格里拉酒店搞咗個典禮。雖然撞正八號風球高高掛，但超人李嘉誠（圖）冒住風雨畀面出席，十點半已經到咗會場。
由於事前唔知超人會現身，隨後嘅新聞發佈會又喺11點先開，加上風雨飄搖冇記者早半粒鐘到場，所以記者行家冇人見到超人，大家只係由深圳中航集團董事長吳光權口中得知超人到賀。
吳光權話，佢同超人好老死，14年前深圳中航上市時，超人已經入股做策略投資者，其間只有增持並冇減持，家揸住約一成股權。深圳中航旗下喺深圳有個綜合地產項目，係同超人合作，實行有錢齊齊搵。不過，吳總話，超人今次到場純粹係賀吓深圳中航，大家冇傾過乜嘢合作大計。