正所謂「貴人出門招風雨」，噚日《爽報》第一日中午版面世就招嚟八號風球！肥老闆黎智英每次有新搞作都要玩「晒冷」，9月19號出世嘅《爽報》，都未擺滿月酒，肥佬黎已經要谷行佢，加印都唔夠喉，仲話要加多個中午新版。
報道颱風股市最新動向
雖然噚日凌晨四點幾掛八號波，但朝早七點幾八點，老總張劍虹同一班編採部手足已經返到將軍澳蘋果總壇，為《爽報》中午新版搏殺。老總穿梭突發、財經各部組，睇吓有乜大新聞，喺颱風吹襲下，最大單當然係船撞杏花邨。突發組班兄弟將挖泥躉船撞岸相傳返報館，《爽報》頭版即刻要改。咪以為港股冇市，財經版可以他條，外圍同大陸股市最新動向，喺中午新版《爽報》亦要即時報道，簡直就將免費報紙當免費電視台新聞咁運作。
雖則要等埋九點半大陸開市，但十一點零鐘已見老總揸住份新鮮滾熱辣嘅《爽報》中午新版喺度睇。十二點零鐘，大埔風勢仍然猛烈，但就見街上大排長龍，市民冒住風雨攞新版《爽報》，見到市民咁熱情，一班手足興奮未過，已經擔心肥佬黎下次唔知又想出邊招！
李華華
mailto:[email protected]