最近hit爆歐美嘅金句王，非34歲、自稱獨立交易員嘅拉斯塔尼（AlessioRastani）莫屬。佢接受BBC訪問話，個個交易員都唔理經濟點復蘇，只係關心點先可以賺錢。使唔使講到咁白呀，抵你畀網民鬧無良心！
個個唔理經濟齋講金
佢仲話，每晚發夢都希望見到衰退，已經等咗呢一刻3年。語出驚人嘅仲有，「唔係政府統治全球，而係高盛！高盛同其他大基金一樣，根本唔會理拯救計劃成唔成功。」難怪BBC女主播都O嘴。
講到敢言，咱們香港都有一個代表──辣媽胡孟青，對於拉斯塔尼嘅「豪語」，青姐話，交易員頭腦好簡單，個個都淨係想搵錢。雖然交易員買上買落都可以搵到錢，但家造上就死硬，所以拉斯塔尼先會講埋啲咁嘢，諗住造低個市搵錢！青姐仲話，拉斯塔尼唔算黑心，皆因家個個都唯恐天下不亂。
話說，拉斯塔尼呢段3分鐘嘅訪問，喺網上瘋傳。有人覺得佢講出唔少交易員心聲，讚佢坦白兼勇氣可加，但亦有人懷疑呢位「交易員」係假嘅。雖然BBC同拉斯塔尼本人已經澄清自己身份，但都畀外國嘅「高登」友起底。笑佢講到咁勁，原來只係住喺倫敦南部一間值20萬英鎊（約244萬港紙）嘅屋仔，間屋仲要係佢女友個名。
李華華
mailto:[email protected]