一班年輕金融才俊，在私房菜「廚藝」慶祝生日，一行11人，每位580元，價錢媲美高級酒家。與男友同行的Sam說，菜式最難得是新鮮，食物油而不膩。她最欣賞大蝦及石頭魚湯，盛讚「屋企餸但有五星級酒店水準！」
當然「廚藝」的來頭一點不小，財經事務及庫務局局長陳家強是捧場客，嘉欣亨亨及許冠傑食過都讚不絕口。「廚藝」私房菜的負責人是葉安妮，她的母親是人稱美姨的「富豪家廚」鄧美。盡得母親真傳，葉安妮說：「私房菜嘅靈魂就係廚師。」
富豪鍾意清淡
未談「廚藝」，先談美姨。她曾在何鴻燊三太陳婉珍，及潘迪生家擔任家廚多年，02年退休，決心經營私房菜，同時把手藝傳授給女兒。安妮說：「最初係媽咪想開分店，一人做一間，03至04年佢結束咗自己嗰間，退居幕後幫手設計menu。」此後安妮一直擔任大廚，「富豪唔係日日喺屋企食鮑參翅肚，佢哋其實鍾意清淡啲。」
「廚藝」最近從灣仔搬到跑馬地，「新居」地方小，只能辦一圍菜，最多容納14人。菜式是傳統粵菜，工序繁複，十多人的酒席，安妮一手包辦。別看安妮相貌標致，身形嬌小，拋鑊斬雞毫不手軟。由於小時候母親到了富豪家幫廚，安妮要負責照顧弟弟及父親飲食，故自小已不抗拒下廚。也許是遺傳了母親的廚藝天份，她只花幾個月，便掌握到美姨的「富豪家廚廚藝」。安妮亦會不斷改變菜式調味及醬汁，「媽咪講過，成功嘅廚師一定要有變化，唔可以成日獨門，咁樣好易被人跟到。」改變也是為迎合客人口味，「有好多tailor-made嘅菜式，一定唔會玩神秘。我都唔想浪費食物。」
美姨親題菜單
看着菜牌，「古法西施燉嫩嫩」、「唐皇太后雞」，菜名古意盎然，但唔知食乜，所以上菜前，安妮會詳細為客人講解菜式，「菜式名都係媽咪諗，菜牌都係佢親手寫。」經營私房菜多年，不少客人慕名而來，加上成本不高，一直有錢賺，但安妮卻有點意興闌珊，「家嚟嘅都係熟客，就當係每晚招呼朋友。」她希望找到新合夥人，把美姨私房廚藝發展成一個獨特品牌。「我想教人煮我嘅餸，放喺其他餐廳賣。」
記者：張韻珊
攝影：梁志永 羅君豪
政商名流客路廣
靠着媽咪的名聲，以及個人的廚藝天份，安妮客人不乏政商名流。讓她最難忘是許晉亨、李嘉欣夫婦與朋友一同光顧，事後更把「廚藝」推介給別人，令她非常感動。
陳家強升職時，亦在「廚藝」擺了兩圍（當時仍未搬遷，地方可容得下擺2席）招呼親朋。歌神許冠傑一家人也是安妮的熟客。