股市不濟，樓市都冇運行，樓價由高位徐徐回落，交投亦買少見少，地產經紀搵食艱難，早兩日終於有代理行頂唔住關門大吉，流下第一滴血，本港唯一有上市嘅地產代理美聯（1200），日子都唔慌好過。
睇番今年二手成交，可謂有頭威冇尾陣，上個月只得4677宗，比起今年2月高位1萬宗，足足少咗五成有多；上星期周六日嘅10大屋苑成交勁插55%，當中7個屋苑仲要零成交。同一時間，銀行加按息絕不手軟，供樓唔使1厘嘅低息環境已經過去，嚴重影響買家入市意欲。
新盤交投亦唔見得暢旺，最擅長高位散貨嘅長實（001），旗下將軍澳領凱去貨速度遠遜預期。講咗咁多不利因素，唐牛大膽估計，美聯下半年會冇錢賺，以上半年盈利2億銀計，現價市盈率12倍，保守估計去番10倍樓下，起碼要再跌兩成，即由現價3.33元，試落去2.60至2.70元水平。戰友們想上車？忍多陣先啦！
唐牛