下月就任期屆滿嘅證監會主席方正（圖）兩度冧莊，政府噚日宣佈，再委任佢做證監主席多一年，完成埋呢個任期，就做足6年證監主席。
鍾瑞明加盟中移母
方正06年10月開始做證監會主席，首次任期3年，09年冧莊，任期2年。今次再被委任，為期1年。睇呢個走勢，可能做埋出年就唔做。佢今日會喺證監會中環辦事處現身，帶埋新任行政總裁歐達禮出嚟見傳媒。
同樣有新人事任命嘅，有中移動（941）母公司中移動集團。內地企業走向國際化，中移動集團可謂與時並進，日前宣佈董事會外部董事名單，引入咗5位外部董事，其中一位係香港人熟識嘅鍾瑞明。佢曾任行會成員、房協主席，講開又講，今年60歲嘅鍾瑞明，曾經係老董身邊紅人，同唐唐、振英等被視為獲中央栽培嘅政壇明日之星，但唔知有幾多人記得呢呵！