無端端打八號波，令人喜出望外，但唔開市，要推介股份的確有難度，魏力食Lunch時突然諗，究竟有冇「打風受惠股」？由衣食住行四方面考慮，食始終係最必須的，所以要鎖定餐廳股。
打風唔使返工，多咗時間食飯，但為免狼狽，多數人都喺附近快餐店食完就算，所以越多舖的連鎖快餐店越受惠。美心、麥記、KFC都冇上市，剩返嘅只有大家樂（341）同大快活（052）。計本港分店數目，大家樂148間，大快活就有100間，講就腳同受惠打風，大家樂稍勝一籌。戰友昨午滙報，話去大家樂食飯排晒長龍，證明打風的確有利生意。
當然，打風一年得一兩日，對業績幫助不大，但配合埋本港經濟開始轉差，作為防守性股份「一哥」，買定大家樂有錢途。沙士嗰年經濟跌落谷底，但大家樂由4蚊升到7蚊，可見其逆市奇葩的威力。最低工資會對成本帶來壓力，但隨着各行業開始裁員減薪，快餐店生意自然越來越好，大家樂的加價空間將會提高，毛利率隨時不跌反升。
近月跌市，大家樂股價表現硬淨，在17至18蚊水平上落，建議可於17蚊水平分注吸納，中線睇22蚊。
魏力