【本報訊】國美電器（493）昨大跌11.36%，收報2.34元，與今年低位2.33元僅相差1仙，成交大增至7.06億元，市值蒸發逾50億元。有基金經理相信，大跌是與國美「無喇喇」夥大股東黃光裕攜手發展房地產業務有關，更擔心主要股東之間會否再出現意見分歧的情況。
夥黃光裕拓房產惹質疑
一名基金經理向本報表示，前日當他見到國美發展地產業務的通告，第一個感覺是「唔係吓嘛」。他說：「首先作為一個投資者，係絕對唔鍾意見到一間上市公司無喇喇成立一啲同本業無直接關係嘅合資公司，仲要係同大股東合作，即時令人回想起好多嘢。」
但他暫不認為事件代表第二大股東基金貝恩（Bain）開始在董事會失去控制權，「因為暫時貝恩仍然係僅次於前主席黃光裕家族嘅主要股東，若果有啲乜嘢傾唔啱，都可以好似上次咁聯同其他基金，用股票嚟votedown（否決）啲唔鍾意嘅計劃。」
不過，另一名基金經理較悲觀，擔心共組合營公司一事，反映兩大股東之間合作有可能再出現問題。他說：「基金做投資最緊要套到現，原本之前可以功成身退（市傳貝恩早前曾計劃配股但最後未能成事），家仲要再揼本同曾經唔啱嘅大股東搞地產？好難估之後會點，所以大家咪沽咗先算囉。」
投資者起戒心沽壓未完
資料顯示，國美昨日高達7.06億元的成交中，只有約32.5%是沽空盤，與平常日子比較並不是特別多，惟國美是昨日跌幅第7大股份。市場人士相信，昨日成交中，大部份是「貨真價實」的減持，顯示投資者對國美再起戒心，料沽壓持續。
有外資分析員表示，早於年初時，已聽聞貝恩與黃光裕家族希望「各行各路」，但一直未有找到合適的解決方法，到早前公佈業績後，更傳出貝恩有意配股，雖然最後並無發生，國美亦一再澄清貝恩沒有計劃減持，但已令人感到雙方有點貌合神離。