NBA封館，球星為免坐食山崩，唔少都四出放聲氣撈；而貴為天王級球員嘅拜恩亦都唔例外，喺呢個夏天，足蹟遍佈歐、亞兩地，仲連汽車sales都做埋賣K-Car。不過，拜恩咁爛做，無非都係想擴大自己喺中國市場嘅影響力啫！
車價盛惠12萬4千人仔
劉德華賣廣告話「天王之座，等你嚟坐！」帶領湖人5奪NBA總冠軍嘅湖人後衞拜恩都有架「天王車」等緊你！講緊嘅就係佢為平治代言嘅SmartCar近日發售。呢架有埋拜恩簽名嘅限量版車，只喺中國先有得賣，仲要係全球限售500部！呢款車以拜恩嘅綽號「BlackMamba」（黑曼巴）命名，顏色係至cool嘅全黑色，之不過價錢超值只係12萬4千人仔起，睇嚟fans想好似拜恩咁型咁Smart馳騁四方，都可以諗吓買番架！
33歲嘅拜恩喺中國一向深受歡迎，「大帝」勒邦占士、獲迪、安東尼真係都要行埋一邊！而拜恩今年初已與平治推出廣告，講述佢揸住架SmartCar變身「車神」，利用車細細、轉向靈活等優勢勇擒盜賊，真係威風！
「希臘或歐洲我都無任歡迎」
雖然之前拜恩去過澳門同埋中國等地，但就冇為咗sell呢部車而專登再去中國一次，皆因佢都要為未來繼續四出搵機會。NBA封館問題未解決，面對新賽季或者冇波打，拜恩一方面要周圍宣傳球鞋品牌，亦要把握機會向歐洲各國猛sell自己，早幾日去完伊斯坦堡宣傳後，前日又去咗雅典宣傳，仲開腔話：「只要有球隊對我有興趣，希臘或歐洲我都無任歡迎，我會隨時接聽你嘅電話同建議。」
意大利博洛尼亞開出超過600萬美元（約4,670萬港元）年薪合約拉攏佢嘅消息越傳越熱，喺「大帝」、杜蘭特等巨星都未必諗住去海外打波，拜恩去向始終都係焦點，睇吓呢位大忙人最終落腳點喺邊度！
拜恩暑假周圍飛
7月
菲律賓：馬尼拉
中國：北京、上海、瀋陽
9月
希臘：雅典
土耳其：伊斯坦堡
中國：澳門
資料來源：《蘋果》資料室