兩個男人在吹水，A說：「媾女一定要媾空姐」，B來不及反應，A就繼續說下去：「首先一般空姐水準都不俗，又識服侍人，又唔使日日見，佢一飛走自己就鍾意做乜都得！仲有媾到之後搭飛機一折，如果你媾到嗰個係做頭等，仲不時會攞靚香檳、魚子醬俾你嘆……」A越說越興奮：「我一直有個心願，想喺屋企有個空姐推架餐車出嚟派餐，而我就一邊搞佢……」A興奮大笑：「邊個男人唔恨！」B冷笑幾聲：「空姐好麻煩㗎！」A被大盆冷水照頭淋，收起笑容怒睥B，B據理力爭，「空姐份工太辛苦，又受時差影響，情緒易波動，仲有空姐唔着制服時，係唔願意再服侍人，而四處飄泊嘅人，都極希望有個可以落腳的家，所以空姐一但受媾，佢就想同你組織個家，到時佢就不時飛，你就點都飛唔走！」A恍然大悟，B以權威口吻續發表：「剛失戀的女人才最值媾！」「何解？」「剛失戀需要人慰藉，易入手，而失戀女的行為都會好激，包你有意想不到的刺激，而最正係媾到後，一般都會舊情復熾，又或者仍未放得低舊愛，無耐就會好歉疚咁提出分手，自動幫你解決分手問題，唔使俾人話你『𡁻完鬆』不特止，仲得到『大方君子』牌坊歡送……」A認同地大笑，B續說：「而你仲可以用呢個故事，去媾下一個剛失戀的女子，同病相連，肯定即晚得手！」A笑住接下去「咁如果媾到個剛失戀空姐，咪同時滿足晒我兩個願望！」B肯定回答「絕對係！男人咁先係媾女㗎嘛！」此時男人A、B的太太如廁後步出，兩男又繼續替女士挽手袋，陪她們血拼，被她們呼喝！
「最佳女友」只會在吹水時才找到。
作者Profile
編劇、導演兼電台節目主持，認為愛情是沒有工作時的玩意，工作是沒有愛情時的必需。
作者：鄒凱光
逢星期三刊出