全世界都勁吹環保風，電動車當然要開盡Turbo全力發展，三菱i-MiEV作為首批登陸香港的電動車，當然唔可以原地踏步，繼之前推出日本版後，最近再推性能更強的歐洲版，不過偏偏價錢不升反跌，實行用行動逐步打破環保等於貴的定律。
記者：趙慧敏
攝影：陳盛臣
Model:Suki@GME
行走路段止跌回升
i-MiEV雖然已在香港登陸了一段時間，但一直唔夠普及，除價錢問題外，性能都是其中一個原因，不過今次推出針對歐美市場的升級版，就明顯躍進了不少。
今次車廠明顯在性能方面落了不少工夫，回想起i-MiEV初來甫到時，已經向代理借來日本版長測，在四日三夜相處中，確實有一步一驚心感覺，望着儀錶板上耗電量顯示屏不斷下跌，令我每日出發前都必須要擬定行車路線，不敢隨心所欲！而今次歐洲版卻加進反叉功能，按着波棍上新增的「B」檔，當即將落斜時，將波棍啪落B檔，就可以將動力回收，轉化成電源，儀錶板的電腦即時計算新增可行走的路段；換言之，行走路段隨時可以止跌回升。至於另一個新增的「C」檔，即是ECOMode，用了車輛的巡航模式行車，當大家行較多均速路段時，啪落C檔就更加節省電源。
動力配置方面，馬力由原來60匹提升至68.6匹，雖不算多，但總算有進步，扭力就維持在180Nm。雖然馬力差不多，但歐洲版的底盤較日本版更紮實，明顯改善了高速時輕飄飄的情況。
輕輕偷位揸得舒服
兩版本的外形無太大改變，只是長度由原來3,395mm稍為提高至3,475mm，闊度及高度維持1,475mm及1,610mm。車頭設計亦執正了，包括增加LED日光燈，頭燈亦以熏黑處理，帶出多點潮味。另外亦增加兩盞圓碌碌霧燈，令外形更Young。i-MiEV原來的車櫳空間已經不錯，尤其是大銀幕玻璃下，令全車更加開揚。不過車廠都夠細心，為遷就歐美的重量級Size駕駛者，刻意將中控台及波棍台略為偷位，為駕駛席騰出更多空間。
安全方面都做到足，今次在歐洲版上特別增設八個安全氣袋，分佈於駕駛席、B柱門側及車廂內，實行為車廂內所有人提供全方位保護。所謂薄利多銷，相信電動車是汽車市場中唯一一款可以做到性能更高、更普及又更低車價的車形，睇番轉頭，i-MiEV初推出接近40萬元車價，今次歐洲版已經回落到唔使37萬元。當然不排除仲有個原因，就是車價要拍住同級對手Leaf啦！
Mitsubishii-MiEV
引擎：電動馬達330V鋰電池
馬力：68.6ps/3,000-6,000rpm
扭力：180Nm/0-2,000rpm
傳動：CVT無段變速後驅
售價：$369,900
查詢：27211111（寰宇汽車）
