王維基前晚向無綫藝員廣發挖角SMS，眾藝員均承認收到短訊，看來無綫要急謀對策應付。
陳豪：我噚晚都收到個SMS，就算對方出好高人工，但有時人唔係單睇金錢，仲要講求質素，我喺無綫好開心同滿意，陳茵媺都有收到短訊，佢都冇話想走。
鍾嘉欣：收到個短訊，不過我拍劇忙到明年2月，所以唔會諗唔會睇。我入行7年，公司都幫我接好多工作，家我嘅夢想就係喺加拿大買大屋畀父母。
胡杏兒：王維基親自打畀我，寒暄幾句，收到電話都開心，證明自己有價值，不過我未有意思離開TVB。
徐子珊：我收到王維基嘅電話，但對方冇好落實講係邊個，我淨係知道係其他公司，我答佢唔考慮同多謝就收線。
黃宗澤：我冇覆到，自己同公司仲有幾年約，暫時無意跳槽，但希望加薪。
汪明荃：我喺TVB都40年，經歷過無數次挖角潮。我對TVB有歸屬感，所以冇動心過，薪酬方面都希望公司調高啲。挖角係好，證明呢個事業更多人才加入。
商天娥：我拒絕咗，因為老公反對我轉工，做生不如做熟，始終TVB係一間有基礎嘅公司，我唔想做開荒牛。
高海寧：我冇覆，因為冇諗轉工。公司畀好多機會我，人係要飲水思源。
朱慧敏：聽到佢公司名以為係叫裝機，但我有聽晒，我冇覆，個心喺TVB度。
鄧英敏：今日我係同王維基嘅助手見面，搵我哋除咗因為仲有半年就約滿之外，主要都係想我哋過檔拍劇集，不過無綫已經約咗我傾續約。
