馮仁昭四圍超：楊秀惠拍拖食飯玩換位 - 馮仁昭

楊秀惠自從同老孫（孫耀威）分手之後，就同家個金融才俊阿Ray拍拖，數數吓都差不多兩年，佢亦好大方咁公開話，佢哋感情好穩定，就算公開咗戀情都唔怕影響事業，擺明係派定心丸畀男友啦。

背住窗避鏡頭

大前日夜晚8點幾，又見楊秀惠同個鬍鬚仔男友喺中環蒲，佢哋同另外一對好似係情侶嘅友人食飯。鬍鬚仔男友隨意將架車泊喺擺花街，跟住就上咗樓食薄餅，楊秀惠就揀咗個背住窗嘅位坐。
不過冇耐侍應就發現咗記者喺度影相仲通知佢哋，楊秀惠同鬍鬚仔就同另一pair對調位坐，諗住借佢哋做遮擋，點知坐坐吓先覺得唔對路，咁樣影得仲清楚，最後就係男嘅一邊、女嘅一邊，楊秀惠背窗坐。可能知記者喺度有戒心，四個人都食得好避忌，佢哋成餐飯都淨係飲水，不過講到興高采烈嘅時候都笑得好忘形。

一馬當先上車

成晚只係叫咗兩個薄餅食，無點到其他小食，似乎嘥咗楊秀惠呢個《為食總司令》主持，話晒都主持過飲食節目自然識飲識食。餐飯連傾偈都搞咗兩粒鐘，跟住一行人就落樓上車離開，楊秀惠一馬當先落樓，即刻跳上司機旁邊嘅座位，成個女主人咁款，男友就負責開車。