【本報訊】就立法規管一手樓銷售，政府與代表多家發展商的地產建設商會，近年仍未拗掂數。由於發展商日後賣樓稍有過失，可能要負上刑責，甚至要「踎監」7年，驚動到已退休的地產建設商會執委會主席梁志堅，昨開記招希望政府立法「唔好太嚴」，「唔好規限到（發展商）連生意都做唔到」。立法會議員李永達亦臨時召開記者會，重申爭取明年暑假前立法規管賣樓的立場。
另外，因應近年有不少新盤在未派價單下偷步收票，政府建議稍後將透過立法，新盤在未有價單情況下，禁止發展商收票。梁志堅則指新盤開售前禁代理收票，發展商完全不會介意，因這樣只會影響到代理，「咪去返以前咁，千幾二千人排隊，公開發售，到時仲使乜代理，千祈唔好打爛代理飯碗」。
抗拒違規賣樓刑事化
政府就立法規管發展商賣樓進入倒數階段，發展商最抗拒是政府將違規賣樓變成刑事化，發展商職員若以不良誤導手法呃客買樓，將負上刑責，最高刑罰要入獄7年。
梁志堅收集所有會員意見後，昨見記者表達意見，希望政府立法鬆手。梁志堅指發展商賣樓一向循規蹈矩，30多年以來都隨着社會而改進，絕不容許會員走灰色地帶賣樓，所以「立法都唔怕」，但一定要是合情、合理，商會完全同意立法，冀做到公平、公正、透明及公開。惟梁志堅指立法過嚴，對整個行業及香港經濟都會造成深遠影響，「唔好規限到生意都冇得做，到時賣唔到就煩」。
就發展商日後以不良銷售手法賣樓可能要踎監，梁志堅表示，「同政府都傾過坐監呢個問題，但究竟刑期係幾耐，7年、14年、1星期甚至1日，咁就未傾過，大前提係要睇幾嚴重」。若公司職員違規，公司董事等高層也要負上刑責，梁志堅認為，如果「老闆咁戇居叫伙記做唔合法嘅嘢，咁就抵罰啦」。
立法規管一手住宅銷售督導委員會成員李永達表示，最近發現將軍澳一個新盤，發展商連價單都未出就收票，而且「點解收成千七票，只賣到400幾個單位，我唔知入票嘅人，有幾多係發展商嘅職員同埋代理，嚴重誤導買家」，只有透過立法才可杜絕這情況。