N年前講過，法比加斯走佬仲好，而事實證明，我冇講錯。
西甲其實已經冇早幾年咁好睇，呢兩三年唔係巴塞就皇馬，不過有時攝時間等睇意甲，都會睇睇；不過巴塞真係要睇，唔睇真係冇話題，上個禮拜小弟不自量力，走去貼馬體會16倍W，點知？5:0！真係冇得打，要貼巴塞對家，真係需要好大勇氣㗎，波神你話係咪？
是咁的，其實今日最想講嘅始終都係法比加斯，睇住佢大睇住佢走，初時以為佢去到巴塞，都係踢後備多㗎啦，點鬼知季初沙維又受咗傷，法比就把握到呢個機會科騷，家喺西甲已經入咗4粒，仲多過打前鋒嘅韋拿，睇見佢同美斯夾到冇人有，又nolookpass又一腳到位仲入到波，心諗，點解以前當兵冇睇過呢個法比嘅？真係估唔到一向以慢打快嘅法比，可以喺巴塞夾到呢班光速隊友，都話巴塞難估㗎啦！
轉會前後，法比成日出嚟撐舊會撐雲格，你話佢扮晒叉燒又好假仁假義都好，至少佢已經有幾面獎牌落咗袋，喺阿仙奴呢？冇噃！踢咗巴塞幾耐？兩個月都未夠！所以呢，阿仙奴球迷們，你哋真係唔可以怪RVP家陣扭計唔傾續約，條友仔成日傷，仲有幾多年貨吖，你估佢唔怕3張之後俾教授兜走咩？啱啱入夠100球，又係一個里程碑，係時候喇！
把握時機，呢啲先叫叻仔呀，知冇！時間唔等人，講咩義氣吖，做人踢波都一樣，你又話係咪？
文：守丹