剛完成了法蘭克福車展的工作，緊接飛到漢諾威試VW四部新車，率先上場的有Caddy。雖然Caddy只屬商用車類別，但小盒子外形及操控與私家車無異，加上車尾有個超大超實用的尾廂討我歡心，這趟自駕Caddy歐遊的商務之旅雖無飛機商務位的豪華，卻有商務位的舒適空間，輕鬆心情令周邊湖光山色都格外宜人。
記者、攝影：許維雅
平實雙用小盒
今次飛到德國漢諾威試車，其中有三部是VW輕型商用車，日後更有機會陸續引入香港，逐步拓展VW於商用車市場上的佔有率。早於今年年初，VW其實已經正式引入CaddyMaxi到港，但由於返貨數量少經常缺貨，一直都未有機會安排傳媒試駕，今次到德國試車，終於有機會一試Caddy。
話就話係商用車，不過前尖尾方的外貌其實同大碼私家車分別不大，雖然外形唔算突出，直頭可以話有點平庸，但論各方面的實用性就的確頂呱呱，好似中間的雙趟門設計令上落更方便；內櫳儲物位置又夠充足有助收納雜物，令我最欣賞的當然係既大又實用的方形尾廂，30吋大篋放入尾廂後都變得零舍渺小，眼見四處都係單車的德國，心感用來運載單車就更天衣無縫。綜觀Caddy的外形、五座內櫳鋪排及貨物運載能力，對於有意收納一部公私兩用車的車主，Caddy的確係不錯之選，尤其適合車位嚴重不足的香港，一車二用豈不是更化算嗎？
油耗每公里五毫幾
急不及待獨自驅車四出遊覽首次踏足的漢諾威，可惜偏偏遇上塞車頗嚴重的放工時間，趁等待時玩玩導航、聽聽歌，四圍摸摸內櫳配備，多功能軚環、備有導航顯示的錶板小屏幕等都令人覺得配備算不俗。加上1.6公升的直四柴油引擎，油耗只需5.7L/100km，計一計柴油價，五毫幾一公里，即使幾塞車都唔怕肉赤。
至於性能方面，馬力雖然只得102匹，但250Nm扭力帶來爽快起步，加上七前速dualclutchDSG波箱轉波暢順無比，操控感覺夠晒舒適。驅車駛至一望無際的Maschsee湖，兩旁大樹優美如畫的風光，不禁令人慨嘆香港難求如此美景，廢氣排放符合Euro5的Caddy若可成功吸引更多車主真的做到一車兩用，亦為保護美景出一分力。雖然香港所賣的是長陣版CaddyMaxi，車長稍多470mm，但外形及性能大致相同，當然內櫳配備亦唔會有歐洲版咁充足，同埋香港商用車的尾廂要封板或鐵網，呢方面確實失些少分。`
CaddyMaxi1.6TDI（香港版本）
引擎：1,598cc直四柴油Turbo
馬力：102PS/4,400rpm
扭力：250Nm/1,500-2,500rpm
傳動：7前速DSG自動波連+/-
售價：$229,055
查詢：36989688（VolkswagenHK）