資深賓架兼財資高手黃遠輝（Stanley），雖然上月底榮休，但佢退而不休，今個月初跟城規會飛咗去西班牙考察10日。
Stanley同華華講，此行最難忘係到訪巴塞隆拿聖家大教堂，呢座教堂由1882年起開始修建，家陣工程仲進行緊，設計師安東尼高第，終生不娶，將畢生理想同心血傾注教堂工程，令人動容。
大家咪以為Stanley考察之名，旅遊為實，佢真係有做嘢㗎。話說西九發展之初，唔少人曾經建議，藍圖設計要借鑑聞名世界嘅畢爾包地標─古根漢美術館。今次Stanley亦實地參觀，但就覺得古根漢模式，唔係外界想像咁吸引。單係考察期間見到，美術館裏裏外外水盡鵝飛，所以佢同當地市領導禮節性交流時，都忍唔住問，發展超過10年嘅古根漢，究竟每年對畢爾包GDP有幾大貢獻，負責人答覆都好含糊。難怪Stanley話，無論經濟效益定係文化價值，最重要係啲「涵」而唔係個「殼」。
希望退休後多讀書
興趣多籮籮嘅黃遠輝，除咗擔任公職，同埋呢期喺綠田園勤種粟米，佢好希望退休後多讀書，首個目標係睇完買咗好耐、黃仁宇嘅著作《萬曆十五年》，至於再全職工作，相信機會好微嘞！
李華華
mailto:[email protected]
