聯賽要成功最緊要有noise，前日屯門大戰公民鑊氣夠，賽後仲有師奶掟水樽，證明大家都緊張賽果。當然，呢啲場面同巴士中年小學雞「劃界」開拖一樣唔值得鼓勵，希望大家和諧啲！
講起本地波就欲罷不能，好似銅鑼灣皇馬對成龍隊就睇到筆者眼濕兼頭耷。眼濕濕皆因好感動，原來成龍大哥低調贊助港甲隊，呢個義舉打破以往筆者對佢要威、要面嘅誤解；大哥，我錯啦！
一條「龍」一條心
頭耷耷皆因慚愧。死鬼柏楊話中國人一人成龍、三人成蟲，呢個醬缸理論同愛因斯坦既相對論一樣，喺成龍隊身上證明係錯嘅！成隊波係得冧巴，球員名一律印上「龍」字！嘩，場上11人一條心，仲唔遇佛殺佛！銅鑼灣皇馬就相反，場邊掛晒C7、ParisHilton嘅橫額，結果落場自己顧自己。所以呢，筆者呼籲各隊搣晒背脊啲「ChanTaiMan」，咁就踢到好波啦。
講起大哥，點可以唔提部新戲《辛亥革命》呀？可惜土共電檢部門盲光社上身，刪咗佢同李冰冰part床戲，真係豈有此理！大哥為拍好part床戲，特登飲到暈陀陀，將床戲結合埋醉拳，可惜冇眼福啦！大哥重要位置今次被剪，未來凸區領導人唐唐唔應該置身事外。因為外表笨實、內裏蠱惑嘅唐唐，被踢爆犯咗全世界男人都會犯嘅錯——婚外情，所以，唐唐在公在私都應該撐大哥，咁樣分分鐘幫到選情㗎！
文：法比奧