朗尼因傷缺陣、「小豆」開賽不久即被活基治踢傷，曼聯最終要靠「貝碧」加奧雲食糊，失分似乎是意料中事，目前已被「細佬」曼城追至同分。曼市雙雄10月中就碰頭，但願屆時兩軍球員都無傷無病；畢竟今季英超錦標，實在看不出有甚麼球隊可以與他們分一杯羮。
「腦殘」入波，最終帶挈曼城贏波，但論球隊表現，其實並不是特別發揮得好；尚記得領隊文仙尼的金句，就是球隊「不夠人用」！老實說，文仙尼保守地先後抽起迪斯高、阿古路與拿斯尼，換入的只是巴洛迪利、占士米拿與史提芬沙域；今仗之所以能贏兩球，只是愛華頓不中用。要讚曼城，大衛施華才是救世主，陣中粒粒皆星，文仙尼尚埋怨不夠人用？沒錯！曼城所欠的，正正是一名有料領隊！
歐聯首輪分組賽主場贏不到拿玻里，曼城在死亡A組相當難行！眼看拜仁在各項賽事已連贏9場，勁入26球0失球，今晚曼城要作客德甲龍頭大哥，以文仙尼的領軍方針，似乎又是死守求1分算數格。
拜仁主宰賽事節奏
拜仁今季可怕之處，是球隊每場只用3、5成力，就可完全主宰賽事節奏，兼令到對手難以輕易組織攻勢，鋼門紐亞更是經常性「冇嘢做」。列貝利當弗、馬里奧高美斯大勇、湯馬士梅拿勤於走動，再配合「小豬」在中場校炮，拜仁中前場實力相當強。
現時就連洛賓亦趕及傷癒，上仗對利華古遜上陣僅10餘分鐘亦取得「士哥」；如此陣容鼎盛，看來一眾曼城星將實在要「自己顧自己」！一來作客安聯球場已相當難打，二來以文仙尼的領導級數，萬一球隊處於逆境，相信屆時亦幫不了手！
文：丘建威