香港同日本的天氣已然微凉，於是身邊不少朋友即搶閘出發到日本，試勻騎呢溫泉外，更可以插砂做massage，順便去搵千尋，同試冰火溫泉，率先獲得剝殼雞蛋靚膚過金秋！
記者：李鑒泉
部份相片由日本觀光協會提供
no.1 情人節朱古力白滑湯
除了綠茶、紅酒、啤酒等常設溫泉外，遇不同節日佢又諗出騎呢怪湯，如昔日有咖喱同湯麪湯，點浸呀？
騎呢怪誕之湯
有溫泉之鄉之稱的箱根，座落半山的箱根小涌園，是個日日新鮮的主題公園。園內更有近30個室內外溫泉可以選擇，如綠茶、咖啡溫泉，紅酒溫泉更是一支支酒直接倒入池中，你索性撲埋去飲啦！10月是日本「豆奶節」，他們會弄出滿池豆奶同膠原蛋白給你起死回生！另還有超高速急流溫泉、箱根最長的25米溫泉泳池、箱根最大岩石風呂、由9月30日至明年1月9日期間仲有比卡超主題，到時唔知佢滑咗去邊。箱根騎呢之最，非你莫屬。
箱根小涌園
地址：神奈川縣足柄下郡箱根町二之平1297
營業時間：09:00至19:00
入場費：成人約$184起、小童約$133起
網址： http://www.yunessun.com/
no.2 插砂 4倍護膚效果
這些黑黑實實的海砂經過溫泉水高溫「煲熟」後，所含鈉、氯化物會被身體一一吸收，除改善神經痛、風濕及寒症外，令肌膚如脫殼雞蛋般白滑。
鹽焗雞乾蒸之湯
眼前個個像鹽焗雞般，穿着浴衣插入砂中「乾蒸」，為的就是這個日本最正宗的砂蒸溫泉。無敵海景的黑砂溫度高達50至55℃，含有豐富礦物質，可加強血液循環，改善手腳冰冷、便秘及關節炎等痛症，功效更係一般溫泉的4倍，所以人人奮不顧身輪住自埋。但熱力從外到內傳入浴衣中，不到10分鐘便相繼「彈起」，再到浴池慢慢浸溫泉，體內毒素隨汗逼出，雙重夾擊事半功倍。
砂湯里
地址：鹿兒島縣指宿市山川福元3339-3
營業時間：09:00至17:00
入場費：成人$81起、小童$41起
網址： http://www.synapse.ne.jp/npgyamakou/sayuri
no.3 追住千尋！
連宮崎駿《千與千尋》也曾取景的道後溫泉有逾3,000年歷史，屬日本三大古泉之一，而且連天皇、大文豪等也曾在此浸浴。
歷史神人之湯
有沒有發現這棟3層高的木建築好像《千與千尋》中的湯屋？在動畫中被塑造成招待800萬天神的道後溫泉，在現實中亦不遑多讓。溫泉已有三千年歷史，是日本最古老的溫泉。雖然搵唔到千尋同湯婆婆，但每日未夠6時門口早有幾十個公公婆婆排隊等入場，而下午就有唔少年輕人穿住浴袍來浸溫泉，地下浴堂長期人山人海。因傳說以前有受傷白鷺浸完泉水後痊癒，所以泉水有治病功能云云，所以連天皇一家同夏目漱石都係粉絲。1899年有專門為皇室而設的又新殿；館裏有以夏目代表作為名的「哥兒間」，與名人、鬼神同浸一池，然後嘆番杯用溫泉水泡的綠茶，今次仲唔升呢！
道後溫泉本館
地址：愛媛縣松山市道後湯之町5-6
入場費：樁之湯成人約$37、11歲以下約$18
營業時間：06:00至23:00
網址： http://www.dogo.or.jp/
no.4 上冰下火 過夜㷫烚烚
在冰天雪地下赤條條跑入最高50℃的溫泉中，然後在寒風下欣賞整片的白色世界，浸完更可在冰屋飲Vodka過夜，享受真正冰火體驗。
冰火往前衝之湯
深入北海道大雪山國立公園的然別湖，因為海拔800米以上，寒風瑟瑟捲起層層雪霧，舉目處處都是杉樹及松樹，動物都唔見一隻。不過每年冬天1月至3月「然別Kotan節」期間，湖面結冰，就會築起露天風呂、酒吧、酒店及咖啡室。男女老少都數「一二三」後從更衣室直奔百米外溫泉，從-30℃氣溫到高達40℃的泉水，下身㷫烚烚時成塊面狂食西北風，勁High！湖邊仲有冰屋酒吧讓你飲番杯Vodka繼續High，最後在冰湖上的冰屋過夜，勁過小龍女啦！
然別湖自然中心
地址：北海道河東郡鹿追町然別湖畔
入場費：免費
營業時間：06:00至22:00
網址： http://www.nature-center.jp
no.5 靚女玩棍博你幫襯
數十人同時手執長勺在水池搖來搖去，仲唱晒民謠引你落水，簡直係草津名勝。
攪攪吓之湯
「好澎湃呀！」日本三大名泉之一的草津溫泉，自江戶時代起已經以多水同「藥出湯」之名大紅，溫泉面積達500平方米，每分鐘湧出32,000公升泉水，全國噴水最多就係佢！水溫更高達95℃！為了盡快讓泉水降溫，同令水裏的藥物成份相融，當地人以前會以長木棒在水中攪攪吓，成當地溫泉特色之一。今時今日這動作已成表演，每日數場仍有吸引不少捧場客。草津溫泉硫磺味濃，於是他們利用多格木箱收集沉澱物，那些黃色結晶除可消毒外，更能防治皮膚病，買番幾包做手信都好。
草津溫泉
地址：群馬縣吾妻郡草津町大字草津3-9
揉水舞門票：成人約$51，小童約$26
網址： http://www.kusatsu-onsen.ne.jp