新世界發展（017）物業資產件件筍嘢，但同其他二線地產股一樣，股價跌到得番NAV嘅3折，新世界抵撈。新世界最新NAV23.6元，現價（7.68元）又係跌到近金融海嘯價，NAV折讓高達67%，折讓吸引力，同其他二、三線磚頭股一樣。但要咁睇，新世界市值過300億銀，隨手數幾件手頭資產，好似中環新世界大廈、灣仔君悅酒店、萬麗海景酒店及尖沙嘴崇光，件件硬嘢兼筍嘢，而新世界作為大孖沙彤叔旗艦，又hold住新創建（659）及新中（917）等等既可守又可攻嘅企業，尤其後邊新中，隨住阿爺調控解除，肯定為阿媽新世界帶嚟豐厚增值，新世界NAV點只呢個價？呢轉收集新世界，係咁意博折讓收窄到11.8元，現價講緊要翻半番。
廣南股價殘可短炒
廣南（1203）九個月累積跌咗超過50%，往績PE跌到得番4倍幾，就保守計數，集團今年純利無增長，呢個PE水位，都係吸引。又廣南主打馬口鐵產銷，及鮮活食品代理，業務有基本需求，特別前一瓣馬口鐵業務，中線嚟祖國內銷市場潛力好大。呢轉廣南跌得殘，先嚟轉短打，博升20%到1.17元，PE未有耐上到雙位數。
錢雋