敏妮屋企附近名店林立，唔好誤會，唔係Gucci、LV，而係有名嘅食肆，貴嘅有天香樓、富瑤、福臨門，街坊啲嘅有澳洲牛奶公司、麥文記，全部都係數十分鐘嘅步程。近日秋風起，突然想食碗暖暖嘅雞粥，諗都唔使諗就識得去彌敦粥麪店。
彌敦粥麪店最出名係鮑魚雞粥，因為用嘅係車輪鮑，無花無假。由於彌敦粥麪店附近有幾間酒店，所以唔少遊客幫襯，敏妮細個去時見到嘅多數係日本遊客，家陣就大部份都講普通話。不過，佢哋出名係粥，至於油炸鬼就不敢恭維咯，次次食都「中招」，皆因一碟碟攤喺度，所以好快就凍冰冰，靭而唔脆。
人稱校長嘅劉致新，曾經教過敏妮點樣煲出雞味濃，雞件滑而不老嘅美味雞粥。秘訣只得一個，就係「捨得」！校長煲雞粥，一窩粥用上兩隻雞，一隻雞同瑤柱一齊拎去煲粥，另一隻雞就斬件，等窩粥煲好之後，拎嚟滾熟斬件嘅雞，咁樣煲整出嚟嘅粥，有乜辦法唔雞滑粥香。
http://wanmanli.com/blogs/