【專題報道】
外傭居港權案日內判決。即使外傭最終可申請成為永久居民，多少人有興趣留港落地生根是關鍵所在。印尼傭工佔外傭人數最多，有17萬人；印傭工會預料，全港約只有兩成多印傭有意做香港永久居民。有已婚印傭說，寧回鄉與丈夫做小生意，不欲在港過低下層生活，「香港板間房都要租二千五蚊，車費又貴，鄉下有2,000呎大屋，乜都自己種，淨係畀電費。做香港人？一啲興趣都冇！」
記者：張文傑 謝明明
政府消息人士指，一旦政府敗訴，暫難估計申請居港的人數及何時申請，但律政司會向法官申請暫緩執行判決，法官會考慮判決對社會影響，當局有信心法官會答應請求。
有近千會員的香港團結印尼女傭工會顧問AntonyWong表示，現時全港近30萬外傭，印傭逾17萬人，九成以上女性，來港工作最長達12年。他指近八成印傭已婚，年齡以25至32歲為主，絕大部份無計劃成為港人。「好多印傭同丈夫分別出國工作，男嘅去日、韓車廠做啲好低微、要捐車底嘅危險工作；女嘅去台灣、新加坡做家傭攞經驗，之後再嚟香港。」Antony說，印傭多來自農村，來港工作儲夠錢回鄉起大屋、做小生意，過當地中產生活。
從東爪哇來港當家傭的Lestari居港10年，32歲的她兩年前回鄉結婚，丈夫現於南韓車廠打工。她每月將近八成的收入寄回鄉，「一半畀屋企人，一半放自己銀行，家起咗屋，有2,000幾呎。」問她有否興趣做香港人，她說：「冇！一啲興趣都冇！」
嫌香港生活指數太高
Lestari說，香港生活指數太高，房租、車費貴，「喺印尼乜都自己種，淨係畀電費」。她見香港婆婆要執紙皮維生，慨嘆在港生活無保障，「都幾可憐，香港人冇鄉下，（晚年）有乜事唔知點算」。她計劃與丈夫兩年後回鄉，做汽車及電話維修生意，「唔會再返嚟香港」。
Antony估計，欲留港的主要是已和港人結婚或單身的印傭，約佔本港印傭兩成，即約3.4萬人。他相信即使她們的身份證抹去「W」字，加上「三粒星」後，也不會搶本地人飯碗，「印傭英文唔好，唔做家傭都係出去做清潔、洗碗，呢啲工作收入唔會高，主要都係同新移民競爭」。
