港甲開鑼勢頭越來越好，搞的有心搞，睇的有心睇。既然如此就唔好畀佢停，一於搞大佢，打氣女郎或天使或寶貝點稱呼都好，球迷非常受落。無他，球場近年習慣多位剩，有多啲人坐，熱鬧啲！有見及此，提多個男星做代言亦堪稱順理成章，找來幾位波友為10大甲組隊推介以下的代言人，純粹參考！
南華應搵埋林峯
南華──林峯。係，我哋知道南華已快人一步有Fiona及克勤，不過星唔怕多，加上用得林峯，甚麼出鏡限制都迎刃而解。主打歌《不速之約》，乜約都冇晒拘束，世界大同了！
傑志──張繼聰。傑志越搞越一條龍，足球系統由小朋友的足球學校到董之英紀念中學到甲組，強調足球影響生命，甚至決定前途，啱晒；張繼聰曾是港青成員，絕對會認同足球就係你朋友。主打歌《2013》，兩年時間傑志鎖定亞協錦標，除非……末日（張繼聰口頭禪）。
飛馬──陳偉霆。所謂唯快不破，飛馬如其名速度驚人，同樣William堪稱新一代快歌之王，啱key。主打歌《Taxi》，call車由天水圍飛去大球場，球迷有折！
晨曦──譚校長。此提名純屬多此一舉，皆因校長的福祿壽從來都是明星隊主力，而主打歌亦多口提議金曲重溫──《傲骨》！
公民──林子祥&Son。環顧樂壇，原來父子兵罕見，阿Lam個仔算難得一個，主打歌唔使咁煽情，棄《追憶》而選《男兒當自強》！
流浪──Soler。並不是貪Julio及Dino靚仔，而是睇中他們的語言天才，一來可教球員英文，二來又教巴貝利中文，讓大家可以好好溝通。主打歌《失魂》，啱晒球場認人。
屯門──Laughing哥。朋友另有提議為鄭伊健，但近年論聲勢古惑仔稍為不及卧底。主打歌為《潛行狙擊》的《獨行》，越話獨行越多人，與利物浦之歌互相輝映。
深水埗──RubberBand。無他，兄弟兵，有高有低一齊捱。主打歌《發現號》，唔上甲組都唔知咁多大隻佬。
港菁──關楚耀。有錯又好、無錯亦好，要的只是一個機會。主打歌《一年》，不做一年貨仔，但求迅速反底。
大埔──盧冠廷。不是玩懷舊，純粹愛田園感受，襯晒大埔的綠。主打歌《陪着你走》，LuLu都識唱。
文：keyman