伯南克8月尾在JacksonHole上打時間牌故弄玄虛，令市場人士以為會有甚麼驚世措施出台，結果令人失望。自伯老宣佈OperationTwist（簡稱OT），即沽短債同時買長債後，市場幾乎一致認為措施對刺激經濟毫無作用，即使能救到遠水，也救不到近火（歐債危機），大家都話伯老已黔驢技窮，連60年代的招數都搬埋出來，最弊是這一招在當年也不見得有大作用。
中央短期難放水
筆者亦認同市埸看法，以現時的經濟情況，壓低長息意義不大，不過諗深一層，自大家發現QE對經濟實際幫助不大，而且將物價推高，伯老已受到不少批評聲音，要他在俾人鬧到死的情況下推QE3，要求似乎太過份。所謂救唔到近火（歐債危機），美國本身也債務纏身，經濟千瘡百孔，又點顧得咁多，歐洲事最好還是由歐洲人來解決。
歐美情況壞透，不少人都寄望新興市場可以發揮作用，協助穩定市場信心，而港股的投資者最渴望自然是上大人可以放水，話晒美國暫時唔再推QE，通脹近月又似乎有放緩迹象，理論上毋須再大力收水及控制水喉。不過，以近日中央領導人及官員的言論，通脹仍是他們的首要考慮，除非有較明顯的下降趨勢，否則要短期內放水的機會並不高。
港股跌幅的確比筆者原先想像的多，自己博反彈也要且戰且退，不過最近幾日，熊市論變得極為熾熱，連部份大好友都話要等終極一跌，可見市場恐慌情緒已非常高，或是造就大市反彈的有利條件，不過，如期指跌穿17373點，自己都會先清去手上持貨，然後吼機會買入10月認購期權作為博反彈的主力，以小博大，即使博唔到，對整個組合的影響也極微，也可保留子彈日後造淡。
張士佳
寶來證券（香港）資產管理部董事
本欄逢周一、三、五刊出