車仔嘅西班牙靚仔前鋒費蘭度托利斯（費托），上個禮拜日對曼聯「世紀miss」之後，俾人嘲笑係「廢托」。但計我求大俠話齋，佢唔止廢，仲係儍嘅，前晚喺贏史雲斯4:1場英超無端端雙腳飛鏟對手中場高維亞，搞到自己要停3場，不過就好彩就趕得切喺對阿仙奴場倫敦打吡復出。
費托喺輸俾曼聯1:3場英超，雖則喺千萬電視觀眾面前出醜（扭過紅魔龍門迪基亞後面對空門射斜），但總算攞到喺新球季第一個入球，所以啲信心亦開始返番嚟。喺前晚場英超，佢喺29分鐘就幫車仔就開紀錄，而佢連續兩場聯賽入波，大家都對佢充滿期待，諗住佢有望入多一、兩粒，點知喺9分鐘後唔知發乜嘢神經，兩隻腳鏟向高維亞，俾球證甸恩直接用紅牌逐出場。
波帥力撐：唔使道歉
好彩車仔最後都贏4:1，費托先唔使孭鑊，但嚟緊3場英超（作客對保頓、主場對愛華頓同主場對昆士柏流浪）就唔使預佢，不過就趕得切復出踢下月尾（10月29日）訪阿仙奴大戰。對於費托做咗「紅牌阿姑」，車仔領隊波亞斯話冇怪佢：「費托唔使道歉。攔截係比賽嘅一部份，係球證見到都會咁做。」佢仲話費托係贏波功臣：「第一球永遠係最重要，費托幫我哋打破史雲斯防線，令佢哋出現缺口。」
話時話，上周六英超出現「紅潮風暴」，8場波共有4張紅牌，除咗費托，仲有保頓嘅韋達、布力般流浪嘅馬田奧臣同埋韋根嘅高賀利，但係佢哋3個都係打後衞，要做好多攔截工作，攞紅牌嘅機會較高，所以費托張紅牌，完全係佢自己攞嚟。
林伯打後備嬲到走人
除咗費托，車仔場波仲一個談論焦點，就有林柏特嘞。林伯喺呢場再做後備，而戰至82分鐘，波仔作第3個調動，但佢寧願搵新人麥伊治蘭入替魯爾梅利斯，都唔畀林伯落場，搞到林伯超㷫，於是喺完場前5分鐘擅自離開後備席返回更衣室，擺明同波仔玩嘢。波亞斯賽後亦好寸咁話：「係球員都想落場，林柏特亦唔例外。我唔清楚佢高唔高興我嘅安排，不過佢遲早都係打番正選。」
另外，車仔喺場內對史雲斯冇情，但場外就有情，事關佢哋籌到筆逾20萬鎊（約240萬港元）嘅善款，以幫助本月喺史雲斯一個礦場遇難嘅4個礦工嘅家屬。