【本報訊】市面的驗身套餐包裝五花八門，市民未必懂得選擇適合自己的套餐。記者以顧客身份致電5間驗身中心，查詢適合自己的計劃。不過，5間中心的職員均沒有查詢記者的年齡、身體狀況或病歷，就直接建議記者參加中心推廣中的優惠計劃。
香港專業體檢集團向記者推銷驗身套票：「你可以選擇本月優惠嘅驗身券，$1780兩個人（原價$3180一人），不過有啲客人慣咗年年驗身，但係得一個人，佢就兩張券落同一個名，張券簽發起3年內有效，如果之後你想轉名，打個電話嚟就可以！」
記者又向各驗身中心查問有關無謂測試問題，有職員就指「呢啲測試係化驗所不變嘅定律，一定係咁㗎喇，加加減減可能仲貴！」更有職員指「你嚟得身體檢查就唔可以質疑咁多㗎喇！」
最多無謂測試的健康醫療顧問有限公司，職員對問題就顯得不耐煩：「所有嘢創造出嚟一定有佢用處，無用就唔會整出嚟啦！」記者問會否出現假陽性假陰性，職員亦不明白其意思：「我諗你有啲混淆，你有驗個項目咪有結果囉，無驗唔會有㗎！」