近期環球股市氣氛極差，搞到唔少新股臨門叫停，其中一個原因，就係搵唔到基礎投資者認購大飛，好多賓架都叫苦連天，鬼咩，個市弱到咁，就連實力雄厚嘅大孖沙都唔敢玩新股。華華日前同鷹君（041）主席羅嘉瑞（KS）食飯，梗係順便問吓佢最近有無玩新股，點知KS話，去年底中金國際（2099）上市時佢做咗人家基礎投資者，批股份嘅禁售期啱啱過咗無幾耐，KS對住華華苦笑話：「家就變晒蟹貨。」
賬面冇咗一半
睇番中金國際嘅招股價44.68元，上周五收市報24.9元，粗略計一計，KS響中金國際嘅投資賬面就唔見咗成半，不過對於KS嚟講肯定濕濕碎啦。
KS又聽聞，好多賓架搵客人認購新股都好有技巧，例如賓架會畀溫馨提示客人，話呢隻新股好受歡迎、好多人搶，肯定會超額認購好多倍。咁有咩辦法可以認購多啲呢？本住認得多、分得多嘅邏輯，原本諗住認1億，家認夠10億，咁就實無死。
如果同10個客講有5個信，到時隻新股就真係會超額認購好多倍啦。華華終於明白，點解有時啲新股嘅超額認購會高得咁厲害。
李華華
mailto:[email protected]