監警會觀察員見盡警方調查投訴的會面，試過有負責調查的總督察竟與投訴人展開罵戰，也試過有家暴受害人會面時突情緒失控。
資深監警會觀察員顧明仁表示，在其逾2,000次觀察的會面中，較難忘的是一負責調查的總督察與投訴人罵戰，「只係一宗汽車截查簡易投訴，負責調查嘅三粒花（總督察）同投訴人喺電話傾，點知佢一開始就一口咬定下屬無錯。投訴人非常不滿，雙方喺電話度嗌交」。投訴人要求觀察的顧介入處理，但他只會向監警會提交報告反映事件。
家暴受害人歇斯底里
另一觀察員黃江天曾遇過家暴女受害人不滿警方無妥善處理其個案，會面期間情緒激動，「歇斯底里咁大嗌，又拍枱，好彩負責會面嘅沙展經驗豐富，示意等投訴人宣洩情緒，十幾分鐘後佢就平靜落嚟」。
黃稱，觀察員在會面過程須保持中立，不會「插嘴」加入意見，但也有破例之時，「有個投訴人喺會面時係咁講自己同家人關係，講足兩個鐘，完全同單投訴無關，離晒題，我最後忍唔住出聲叫佢講番入正題」。
去年加入觀察員行列的蘇慧賢認為，觀察員工作有助其了解民情，「有個市民投訴999電台嘅警員無同佢講聲byebye就cut線，覺得個警員無禮貌。我聽返整個過程其實個警員好有禮貌咁對答，我覺得市民唔好咁執着，多啲包容」。
《蘋果》記者