首創3D全景　SE凸景紅Phone

作為SE翻身之作嘅Xperia，旗艦級arc更係近期Phone界紅人，最新嘅arcS，CPU升至1.4GHz，照賣極級靚芒靚相之餘，更係手機界首度加入一掃3D全景相功能，長長一張Panorama全景相，駁落3D電視睇，3D景物全部凸晒出嚟，果然係又靚又過癮！

記者：韓繼聰
攝影：林栢鈞
Model：IcyCheung@InterplayWorkshop

3D全景親歷其景

叫得arcS，當然就係arc嘅追加強化版。睇外表一模一樣，但其實內裏Upgrade咗唔少，首推當然係3D一掃全景功能！3D一掃全景喺相機界當然唔係新嘢，但都唔係部部有，喺手機就更加係首見。只要進入相機功能，即可選擇3D一掃全景，攝影時有字有圖教你影，超簡單！用佢個靚芒睇當然夠靚，但冇裸視3D，有啲可惜。不過用HDMI接上3D電視睇，3D感即時出晒嚟，用嚟影山頂、海邊呢啲無敵大景觀，重溫時真係有啲親歷其景嘅感覺！

■外形同arc一樣當然唔少得機側arc設計。

■進入相機功能，即可選擇3D一掃全景。

■有字有圖教你影3D，一掃即拍！

■與上代同樣設有810萬像素ExmorR影像感測鏡頭。

■用HDMI輸出即可接駁3D電視睇3D全景。

新U加速升呢

新機當然唔止多個3D全景，喺事事求快嘅時代，換粒U升呢加速真係唔少得。arcS就將原來嘅1GHzU提升至1.4GHz，官方聲稱，比起舊arc啟動相機同媒體轉換快25%，睇網頁亦快20%。但講真，作為旗下最強手機，到今時今日都未有雙核，梗係有啲失望！不過所謂數字如浮雲，arcS用上手都非常流暢，試用時絕無窒機情況，加上預載Android2.3.4，都可以收貨嘅！特別一提，arcS今次有靚爆嘅白色同粉紅色，絕對係好色人士佳音！