淡友上周大開殺戒後，至周五紛紛平倉計數，令唔少股份低位急彈一兩成。本周季結在即，加上期指結算，基金為免今季輸得太難睇，應該會掃高揸重貨而又跌得慘烈嘅股份，有利日後以更高價出貨。
先向惠理基金埋手，上周五中國無線（2369）低位無端勁彈7成，埋單仍漲19%，可能是惠理季結粉飾行動之一。以惠理持倉比重推斷，恒大地產（3333）本周隨時大反彈！
據惠理價值基金8月份投資報告顯示，現時持倉最多為華晨（1114），佔基金9%；其次為恒大，佔7.2%。不過，華晨由8月高位急跌4成，唔夠恒大急瀉5成咁誇張。要博季結反彈，恒大好過華晨。
炒作誘因方面，恒大料「十一黃金周」有10個項目銷售，涉及樓面100至130萬平方米，計及屆時在售的700萬平方米，共銷售800萬平方米。憧憬銷售理想，有利恒大炒上。
走勢上，恒大上周五低見2.89元後顯著回升，收報3.30元，倒升3.8%，以低位計更彈足14%。RSI已跌至超賣水平，加上出現底背馳，兼有大成交配合回升，可睇高一線，3.30元附近小注買，博彈上10日線3.63元，跌穿3元止蝕。
魏力