唔夠一個禮拜，又到每年都逼爆嘅十一黃金周！記得某年，約齊成班Friend，飲食吃喝再直落欣賞煙花，點知行出街，周圍嘅餐廳打晒蛇餅不特止，仲要天公不作美，天上灰濛濛睇維港煙花，勁無癮。今年醒咗，單撈定各類AndroidApps，仲玩埋AR追蹤購物優惠，打WarGame咁款，高呼過癮！
記者：陳國輝
攝影：楊錦文
Model：CoCo@GME
擴真實景搵着數
近期好多商場都已出App，提供消費優惠資訊，例如免費泊車、買滿幾多錢就送Coupon等，唔喜歡咁傳統，不如試吓玩《行Guide（Leisure）》內嘅擴增實景功能！AR（AugmentedReality）就係將虛擬圖像混入到真實環境嘅視覺技術，套入呢個App，意思係用佢嚟追蹤附近優惠咁解！當你打開鏡頭，並沿不同方向移動，好快會發現一個優惠提示彈出嚟，有興趣便可Click入去睇埋優惠詳情，當然仲有詳細嘅地址及電話俾你查詢，諗住喺附近行街掃貨就啱晒！
另外，呢個App仲提供信用卡優惠資訊畀你，只要啟動手機，就可以獲得最筍嘅消費資訊，唔使四圍撲格價！
《行Guide（Leisure）》
系統：AndroidOS
類型：消費購物
費用：全免
2 度身訂做食晚飯
每次出街食飯，最怕係要拎飛等位，尤其黃金周咁重大嘅日子，唔打蛇餅就奇怪！最醒目做法，就梗係預先留位，《Openrice》內提供中、西、日、泰等不同餐廳分類，仲可分為酒店式、自助餐、打邊爐等不同檔次，完全可根據個人筆值同喜好來搜索！想喺附近搵食的話，更可利用GoogleMap功能，Search就近心水餐廳，然後根據查詢電話Book枱留位，好方便。
《Openrice》
系統：AndroidOS
類型：飲食推介
費用：全免
3 隨身ATM瘋狂購物
又掃貨、又瘋狂飲食，預咗使唔少錢啦！萬一帶唔夠Cash出街，甚至有啲地方連信用卡都話唔收嘅話，點算先？聽到《香港櫃員機指南》呢個名稱，應該唔使點介紹，佢最大作用係根據你用嘅銀行卡，包括恒生、滙豐、東亞、中銀等，透過GoogleMap，快速搜索附近嘅ATM位置，去到現場，你仲可以影張相做記錄，可惜無提供任何評分，有所缺失。
《香港櫃員機指南》
系統：AndroidOS
類型：銀行服務
費用：全免
4 觀天霸位賞煙花
為咗霸靚位睇煙花，未到黃昏，成個尖沙嘴又再次逼爆，加上警察嘅封路措施，如果想打退堂鼓真係極為艱難！唔想掃興，不如睇定天氣預報，《我的天文台》係天文台自家App，佢除咗提供未來幾日溫度、濕度以及整體詳細描述之外，仲可選擇不同地區，留意埋最新現場圖片，萬一咁唔好彩臨放煙花前幾粒鐘落濛濛雨或天陰陰，都仲有機會執行PlanB！
《我的天文台》
系統：AndroidOS
類型：天氣預報
費用：全免
5 地圖搜尋通宵巴士
玩到半夜三更，又係意料中事。雖然當晚多數有通宵港鐵直達你屋企，但好似小記呢類習慣邊搭車邊瞓覺嘅人，能夠坐巴士、小巴先至最「舒服」！《香港通宵交通》支援點對點查詢功能，只要開啟GoogleMap，篤一下所在位置，然後揀目的地，程式就會即時彈出通宵巴士路線，甚至各站嘅位置都有；更搞鬼，呢個App支援落車前響鬧提示，唔驚瞓過龍。
《香港通宵交通》
系統：AndroidOS
類型：交通工具
費用：全免