喺股票市場，周不時都會聽到名人入股上市公司，由於佢哋身份尊貴，上車價往往被視為鐵底，即牢不可破也。可惜家陣個市弱過藥煲，點石成金威力失效，好似中投三寶當中嘅旭光（067）同中芯（981），已經先後隊穿中投嘅入股價。阿爺都冇面畀，其他人又點可能獨善其身呢，最新要損手嘅，就有早年入股比高（8220）嘅周星馳。
星爺09年中將旗下尖沙嘴商場gi，以總代價3億銀賣咗畀比高嘅前身帝通，換來一批股份同可換股票據，成功一嚐做上市公司大股東嘅滋味。星爺入股之後，比高股價就好似爆漿瀨尿牛丸咁，井噴式上升，最多累計升咗超過兩倍。不過，今年市況逆轉，比高亦不敵地心吸力，上星期五仲穿埋星爺入股價10仙，收報9.40仙，怒插15%，如果同今年高位比較，已經冇咗62%。
至於未來有咩高危股，相信股神畢菲特用每股8元入股嘅比亞迪（1211），會係其中之一。
唐牛