請嚟大棚紅星撐場嘅《蝦仔爹哋音樂舞台劇》，前晚繼續喺灣仔伊館上演第三場，今趟有楊千嬅做嘉賓，有份演出嘅林建明（大姐明）繼續對嘉賓手多多摸勻全身之外，竟宣戰話要做千嬅與老公丁子高嘅小三，搞到千嬅唔知笑好定嬲好。同場嘅有盧海鵬、戚美珍（三嫂）同埋賈思樂等，友情客串嘅仲有關菊英同陳百祥，現身捧場嘅有黎瑞恩、曾勵珍、米雪、李香琴同埋菊姐密友Willy等。
身材立體任摸
着住7吋高踭鞋嘅千嬅，出場無幾耐就被大姐明摷勻全身，佢唔單止無嬲仲大方咁笑住講：「唔緊要，我除咗個人好3D之外，身材都好3D，隨便摸啦！」之後大姐明又認自己係佢嘅粉絲：「千嬅我真係好鍾意你，我好鍾意聽你啲歌，但我更加鍾意你老公啊！可唔可以畀我做你哋小三？」搞到千嬅笑到天翻地覆。
讚鵬哥扮嘢叻
鵬哥竟然追問千嬅有冇大肚：「你唔係有身紀咩？做乜仲着高踭鞋？同埋你幾時再開個唱，可唔可以請我做嘉賓？」扮演三嫂前男友嘅陳百祥，就喺台上勁踩對方身材，搞到三嫂要向台下嘅黃杏秀求救。
個騷做完後，問千嬅會唔會介意大姐明做小三，佢就話：「如果我老公唔介意，我冇問題㗎！仲會即刻起身讓埋個位畀佢坐㖭！」至於鵬哥自薦做個唱嘉賓？千嬅回應：「真係冇問題，鵬哥扮邊個似邊個，請咗佢你想搵邊個歌手都得。」