潮流興「空降」，終審法院常任法官陳兆愷噚日啱啱上任做小童群益會新會長，之前佢無擔任過該會職務，不過小童群益會係社福機構，唔同港台，做會長最緊要有心，做過10年香港童軍總會會長嘅陳官，承諾會悉力以赴，做到最好。
陳官同八方講，以前間中都有擔任小童群益會活動嘉賓，而小童群益會前身男童會，由多名法官及熱心人士成立，所以佢同小童群益會總算有啲淵源㗎。
有75年歷史嘅小童群益會俗稱「B仔記」，噚日舉行會員大會，按會章做咗6年會長嘅「小金王」胡經昌夠晒鐘起身，委員會選出陳兆愷做新會長，任期3年。今次大會特別整咗支有個「童」字嘅權杖，好似港姐交棒咁由胡經昌「傳位」畀陳官。
陳官同B仔記有淵源
接棒嘅陳兆愷雖然係大法官，但法庭以外好講得笑，佢話新上任心情戰戰兢兢，希望轉任榮譽會長嘅胡經昌繼續貢獻B仔記之餘，最緊要係「睇住細佬」。62歲嘅陳官同胡經昌都係香港華仁舊生，陳官仲係師兄，自言細佬，謙啫。
陳官話好鍾意接觸年輕人，「咁樣心境都後生啲」。原來佢自細喺灣仔大，成日喺B仔記附近玩。講開又講，B仔記其實同法官有莫大關係，因為上世紀三十年代，有法官見到四處街童，好多細路要喺街上擦鞋搵錢，就同熱心人士創辦小童群益會前身男童會，協助失學貧童，因此陳官同B仔記都有啲淵源。
胡經昌回顧身在B仔記23年往事，自稱係老頑童，多年來喺同僚身上學到好多嘢，仲即場鞠躬致謝。執行委員會主席鍾志平讚揚胡經昌瞓身為B仔記，「上星期佢卸任在即，仲親身上去廣西視察以『群益』為名興建嘅學校進度，佢真係好似某人咁講，盡力做到最後一秒鐘㗎」。即惹來哄堂大笑。3年任期過後，陳官年屆65歲，達法官退休年齡，陳官話續唔續任，屆時睇情況而定，全身而退嘅話，咪多啲返B仔記囉！
mailto:[email protected]