無綫近日是非多，台前幕後大地震揭發公司待員工薪酬刻薄，出爐港男冠軍李晉強雖被無綫認作親生仔，但每月近乎零收入，表面風光的他慘過賺最低工資28蚊時薪的工人。倒貼當藝人的他去街不敢亂花錢，只嘆15蚊茶餐。
出爐港男冠軍李晉強（Clayton）雖順理成章加入無綫，但是喜是憂言之尚早，在任一年由無綫做經理人，但每月並沒有底薪，換句話說等運到期間要食穀種，冇工開的日子，Clayton百無聊賴，前日中午被發現與落選港男江俊霖相約逛銅鑼灣，兩男全程齋睇唔買，行到攰嘆平價下午茶餐醫肚。
賦閒兩個月
現年24歲、報稱學生的Clayton獲獎後便向加拿大就讀的學校申請暫時休學，留港發展，自今年7月中獲選至今，賦閒了兩個月，據知Clayton現在跟無綫的一紙經理人合約，若無綫替他接到工作便抽佣，如安排他出席宣傳則有限度獲交通津貼，稍後加入為期4個月的藝員訓練班，才可每月獲固定1,000元津貼，以現在香港的生活指數來計算，Clayton睇怕要以積蓄或家人支持補貼才能完成當藝員的夢想。
零收入的Clayton惟有死慳死抵，前日約好友江俊霖見面，也捨棄幫襯餐廳醫肚，改到時代廣場的美食廣場，兩男AA制，Clayton買了僅售15元的小吃配汽水，他全程吹水為主。其後他們又到時代廣場和Sogo行街，格價後仍無收穫。
靠積蓄生活
Clayton是雙料冠軍，兼奪最佳台型大獎，兩獎在手也只得兩萬元獎金，坐食山崩，獎金都差不多花光，對於要倒貼當藝人，Clayton似乎敢怒不敢言，他前晚在電話中說：「捱吓囉，我新入行，OK嘅，唔係貼好多，好彩選前我有積蓄，仲可以支持，我咁大個仔，盡量唔想向屋企做伸手牌，我返嚟香港發展，屋企人畀屋我住已經慳好多。」對於無綫近日爆挖角潮，不少台前幕後嫌人工奀走人，Clayton則力撐：「我點都以TVB行先，冇佢我就冇今日。」
無綫外事部副總監曾醒明昨日就李晉強無底薪一事回應說：「香港先生同香港小姐近年係冇底薪，呢個做法TVB已經實行咗一段時間，其實係佢哋唔想有底薪，因為佢哋本身底薪唔會多，反而冇底薪嘅話，佢哋接工作收嘅酬勞就會佔大部份，而且仲係即袋，自由度又會大啲，TVB做佢哋經理人幫佢哋接工作，只係會抽番啲佣。」
採訪、攝影：比華利、李志明