才子陶傑喺《爽報》寫情色小說，引起唔少爭議，佢喺Goyeah.com網站節目《大陶殺》自爆創作淫樂小說心路歷程，話唔明白點解老師唔畀學生睇，因為睇佢啲小說可以學中文，而佢同女主持JJ（賈曉晨）嘅對話，比佢下筆內容更爆。
「我可以令你好濕潤」
陶傑指近10幾年連載小說喺香港消失，寫情色小說人才凋零，所以佢今次以將Erotic小說引入香港嘅使命，懷着凝重心情動筆，自言無身段、無包袱。陶傑話寫情色小說好易，「do過吓嘢就識」，但寫得好卻要有鋪陳，令讀者睇完之後，好似品嚐咗一頓精美嘅法國美食咁，「sex只係手段，唔係目的」。
咁陶傑係咪性經驗好豐富，寫情色小說駕輕就熟呢？佢自比金庸，話金庸唔識武功都成為武俠小說名家，講到呢處，佢咁同JJ講：「你可以畀啲靈感我，畀啲實戰經驗我。」JJ聽到才子挑逗，哈哈大笑，「我生活好枯燥，畀唔到靈感你。」陶傑打蛇隨棍上：「我可以令你好濕潤。」