【記者許偉賢報道】庸官當道，退隱江湖3年的陳婉嫻也要出山，參選黃大仙區議會。與特首曾蔭權素來面阻阻的陳婉嫻受訪時直斥「呢個政府好擾民」，大鬧曾班子漠視基層苦況，只向地產商傾斜；明年或能以「超級區議員」身份重返立法會的她警告新政府「唔好再咁豬（炳）」，否則惟有繼續鬧爆。
高官拒接納意見
官場中人聽到陳婉嫻「回歸」，未見其人先腳震。「我未至於係官場鬼見愁嘛，有人唔鍾意我，但有啲官都同我好啱傾。」陳婉嫻口中「唔鍾意佢」的高官包括特首曾蔭權。她自揭在曾蔭權任財政司司長時已與他「結怨」，「Donald做財爺時已經對我好有偏見啦，我講啲嘢，佢唔啱聽嘛」。
她稱當時要求政府增加開支，「Donald只係陰陰嘴笑住話『嫻姐，點樣可以有（收入）呀？』」陳婉嫻激動指當時已建議曾蔭權向大商家徵重稅，但未獲回應，憤道：「美國家都徵『畢菲特稅』啦，特區死都唔肯做。」
曾蔭權自此對她「幾有情緒」，雙方的會面不時「不歡而散」，陳婉嫻指曾蔭權最大問題是拒納意見，有關毛病同樣出現在其領導的曾班子內，舉例指在改善基層住屋、收窄貧富懸殊及完善土地規劃等問題上，政府官員統統將專業人士意見當「耳邊風」。
派錢好事變擾民
近年曾班子屢屢「好事變壞事」，「市民攞嗰六千蚊，本來可以好開心，但政府又要啲公公婆婆搞咁多嘢，根本係擾民，市民點會支持你？」她坦言：「呢個政府雖然未到不學無術，但如果認真肯聽專業意見，今時今日唔會搞成咁。」
假若在年底區議會選舉中得勝，陳婉嫻明年有望以超級區議員身份重返立法會，她發言時怒片高官的招牌「七旋斬」手勢自然又再重演。曾班子時日無多，陳婉嫻現只寄望新政府吸取教訓，力促新特首廣納民意，諷指：「如果珠玉在前，個政府仲係要咁豬（炳），咁真係好豬（炳）喇！」