「交畀我，我會令隊波回復舊觀。」如果呢句話出自第2個人把口，信唔過，但出自雲尼亞里把口就靠得住，因為佢係球壇救火隊代表，救急扶危。國際米蘭周四正式委任佢領軍，代表意甲版《烈火雄心》又再上映，擔定凳仔等睇好戲。
國米經加斯柏連尼一搞，何止火燒後欄，簡直係冲天大火災。班主莫拉堤有冇心畀張長期飯票雲尼亞里，唔知，但搵佢救火，執爛攤子就無可厚非，因為呢位59歲教練好擅長撥亂反正，領軍生涯初年，就喺89年令弱勢嘅丙組仔卡利亞里圖強，兩年間由丙組升上甲組。93年，佢又一手扶起當年由巴迪斯圖達壓陣嘅費倫天拿，令紫百合降班一季就踢番上甲組。
之後佢去過華倫西亞、車路士教，但救火代表作都係喺意甲出現；07年，佢帶領啱啱升番班、百廢待興嘅祖雲達斯得到第3名。咁都未算勁，兩年後佢又喺季初執二攤，代替史巴利堤執教羅馬。當時羅馬開季兩連敗，人人睇死隊波，佢就成功令隊波得亞軍，當年帶領國米嘅摩連奴都俾佢追到氣咳。
做慣二奶好難坐正
好嘞，講到佢咁堅，原來只係停留喺救火，當隊波風平浪靜，需要爭霸就唔多成功，好多時仲係得聯賽亞軍，正牌「二奶」命。
所以，咪畀我求大俠睇死，莫拉堤擺明似包二奶，逢場作興完就換畫，當雲尼亞里今次救完火，tune好隊波後就要做好被飛嘅心理準備。睇國米只畀佢一份到2013年6月嘅約，唔算長。可能因為超過半年冇嘢撈，當國米正式公佈委任雲尼亞里領軍之前，佢急不及待喺電視台高呼會搞好國米。
講到錢，有消息話啱啱俾國米請食無情雞嘅加斯柏連尼，年薪好似得120萬歐元，加埋係加斯柏連尼答應解約，國米賠好少，有傳相當於3個月人工嘅30萬歐元，真係嚟時cheap，走時仲cheap。
雲尼亞里
曾教著名球隊
費倫天拿：93-97
華倫西亞：97-99/04-05
馬德里體育會：99-00
車路士：00-04
祖雲達斯：07-09
羅馬：09-11