大市弱過藥煲，恒指單是8、9月累積蒸發近5000點，大部份散戶難逃損手命運。
本報昨日成功訪問231名18歲以上的散戶，逾半投資者（近55%）表示年初至今投資錄得虧損，平手投資者佔35%，仍能保住利潤的投資者比例不足一成（9.96%）。
在損手投資者當中，45%的受訪者虧損幅度達3成以上，虧損一成至三成的比例亦近35%。
40%散戶唔知牛定熊
大市氣氛不濟，近四成受訪者認為港股已進入熊市，認為仍處牛市的比例不足兩成（19.91%），但有約四成對後市感到迷惘，不肯定市況屬牛、屬熊。
散戶點睇
繼續沉 係無底深潭
「本來諗住個市會好啲，點知死人伯南克講嘢無料到，仲搞到咁大鑊。我估跟住都應該繼續沉，仲會係無底深潭，家都係揸住啲內銀股收息，當做定期。之前一路買一路縮，點知最後逼到埋牆角，家惟有等，就算要等年半都無法……家賺少少即走，唔貪心賺幾百已經好叻。」
無QE見萬一都唔奇
「後市好悲，萬九點已入咗一注，下一次要到萬七先有吸引力，無QE，去到萬一都唔奇。有客高位入咗貨，佢哋都相信只要有明天，就有機會翻身。建議客戶趁機換馬優質及高息藍籌，唔好再信二三線股或者民企，但亦有客克服唔到蝕錢離場心魔，有客盈警前入咗思捷，到廿幾蚊有賺唔走，死牛一面頸。」
基金反應
今年冇人賺到錢
「第三季有好多對冲基金損失慘重，好多都清倉，令市場變得波動，最勁會喺第三季尾及第四季頭，今年都冇人賺到錢……第三季基金倒閉較第二季更多，今年已經全部Write-off（撇賬），譬如保爾森個基金跌咗40%，唔通今年剩低嗰90日，道指會勁升幾千點咩？淨現金仲有得救，玩波幅好難贏……波幅指數由7月10點升至現水平30至40點，反映市場非常恐慌。」
揸大股輸到你嘔
「梗係唔係牛市，但今次同金融海嘯唔同，同00年差唔多，08年公司流動性差，部份就死，家啲股份仲係幾OK，00年個市大約跌一半，但好多出口股創新高，今日都有美國蘋果創新高……儲局新招明顯冇用，有用就唔係咁嘅死款。」旗下基金跌10至20%，現時基金長倉佔一半，另一半就短炒及做對冲，上個月跑輸大市，今個月就跑贏。唔係揸好多股票都輸到你嘔，揸大股都輸死你，唔好話揸細股。」
