蹺口巉手，俏麗鬼馬兼潑辣的媽姐，首推《好姐賣粉果》中的鄧碧雲，與譚蘭卿「對峙」，橫紋刀劈扭紋柴，十分精彩，換了別個對手就有點遺憾。好姐一口中山話，一手靚粉果，叫人回味，再沒有第二個碧姐了。
（題外話：亞視過無綫的江美儀，近日嵐姐和宋三奶奶角色反差大，但演得很自然，無意中發現她某角度有少少似鄧碧雲。當然戲路沒鄧縱橫，這是機會問題。又無意中發現江也演過媽姐呢。）
上世紀三四十年代女人自力更生沒什麼出路，多在「薦人館」搵住家工，常碰上鹹濕老爺，毛手毛腳。但每月有三、四十元薪金，雖然打爛嘢要扣人工，不過逢年過節另有打賞，買餸可以打少少斧頭，生活也算有着落。
當年很多電影都以媽姐為題材，1952年《紅運媽姐》（喜劇）、1954年《媽姐淚》（悲劇），陸續有來。紅星除鄧碧雲外，任劍輝、白雪仙（俏銀姐）、白燕、紅線女、小燕飛、周坤玲……都演過媽姐。還有，梁醒波、新馬仔、鄧寄塵、鄭君綿、胡楓……亦反串過「土鯪魚」，比女人更「銷魂」。胸前塞了兩個橙的新馬仔，迷倒不少「鹽倉土地」。