呢個禮拜《爽報》一出，全城打個冷震；有收費報減價迎戰，有免費報喊到一把鼻涕一把淚，仲有噴飯言論話免費報令人蠢。真係唔爽一爽，唔知頭腦醒唔醒？
C老闆指摘肥老闆旗下印刷公司，周五唔肯再賣人情加印至80版，只係按合約印64版係冇情義。佢當年係龍門陣形容大學生打3份工買唔到樓係無能，浪迹地產界、出版業多年嘅佢呢鋪「被蹺起」，應該明白無能同無奈嘅分別。
仲有，免費報喺得朝早派，就係畀市民逼巴士同地鐵期間，大概了解下世界發生咩事，呢杯咖啡當然唔可能頂到去消夜啦！我哋跟手要買份收費報，或者用「埃瘋」瀏覽埋國際傳媒，咁咪三餐營養齊全囉。
香港呢幾年就係咁奇怪，從去完廁所要洗手、落雨濕濕地面跣、飲熱飲會辣嘴等，3歲都識嘅嘢都要人提醒後，終於出現傳媒搞到人蠢嘅謬論！哎，呢個將「埃Pat」當遊戲機玩嘅社會，有咩理由唔變蠢啊！
講番本地波，球迷同球員真係要多謝「現在」台，佢哋唔似「良心台」咁翻炒冷飯，整個頻道專播本地波，認真有心。至於有人話球隊支付轉播費做法荒謬，「全世界係香港至咁！」鬼叫全世界係得香港波最不得人心咩？
電視轉播搞掂，有埋足球寶貝，街坊球迷更加捧場，乜嘢盛世嘅因素都有，各位球星大哥又點呢？筆者睇過幾場波，覺得本地波冇勁旅，大家咁高咁大，不過係平均地屎啫！
銅鑼灣皇馬有霸氣，將軍澳巴塞有技術，不過遇上屯門、深水埗等弱旅居然冇優勢。當然，正面啲睇，咁樣總好過曼聯炒阿仙奴8:2，同埋巴塞贈奧沙辛拿8蛋。不過，球迷始終最鍾意追星，可惜我哋啲星係用嚟媽叉嘅。
文：法比奧