歐陽靖（MCJin）因一曲《ABC》為人認識，自美返港三年總算做出一點成績。近日他榮升老闆，簽了另一位rapperKT，KT勝在在港土生土長。阿Jin揚言沒有想過自己會成為老闆，他簽新人的最大希望是想繼續將hiphop發揚光大。
被MCJin發掘的rapperKT，於英國念了四年高中，返港後做電話推銷員，之後認識了MCJin，與MCJin本來是波友的KT，有時間必定陪阿Jin出騷，一次阿Jin邀請KT上台一齊rap，於是展開了其rapper生涯。
難忘握林峯手
自言沒有想過會加入娛樂圈的KT，現時仍未習慣身份改變了，他說：「我都唔係好識點樣做，好彩阿Jin將佢識嘅嘢教晒我，有時帶埋我一齊出去做嘢，令我對呢行嘅認識加深咗。」
KT透露工作時見到其他藝人，心情會十分緊張，令他留下最深刻印象是有次見到林峯，他說：「嗰次跟阿Jin去做嘢，林峯嚟到同佢打招呼，之後阿Jin介紹我係佢朋友，林峯就同我握手，我當時都係打咗個突，嗰刻仲扮冇嘢。」
創出自我風格
KT表示於英國讀書時已很喜歡聽hiphop，直至MCJin於香港出現，他更成為其fans，每一首MCJin的歌曲他都背得滾瓜爛熟。雖然被阿Jin邀請過上台演出，KT都沒有想過有機會出碟，他笑言：「自己知自己事啦，我係鍾意唱歌，但從來冇諗過要參加任何歌唱比賽。一來個樣唔得，身形又唔得，都係接受現實啦，好彩阿Jin畀咗個機會我。」
MCJin希望KT可以rap出自己的一片天，他說：「佢嘅長處就係中文比我叻，佢係土生土長嘅香港人，所以佢寫嘅歌詞一定比我到肉，我唔希望佢嘅風格同我一樣。」
採訪：李珮洳 攝影：陳志嵐
場地提供：BLTSTEAK