咪神徐淑敏（Suki）本周一為飲食才俊老公黃浩（Kenny）係養和醫院剖腹誕下第二名愛女Renee，經過幾日休養後，噚日下晝5點半Suki抱住重6磅半嘅細女，係老公同大女陪同下一家四口齊齊出院。由於噚日係Suki27歲牛一，所以佢唔想喺醫院過生日，得醫生批准後就出院慶祝，Suki話老公會陪燭光晚餐過二人世界，不過就未收到生日禮物，但係佢就直言如果老公想亦唔介意再追仔，而且麥玲玲都批佢有三女一子，所以佢亦都唔介意繼續再努力造人。
萬元坐月餐單
Suki返到屋企後就會專心坐月，佢老公豪花5位數字聘請中醫師為愛妻設計補身餐單，當中不乏冬蟲草、花膠等名貴食材。
其實今次Suki嘅細女真係幾好腳頭，囡囡出世Kenny同雜誌官司即刻勝訴，喺Suki出院前，Kenny一早就去咗金鐘高等法院為佢同雜誌單誹謗案上庭，由於勝訴，佢現身時風騷不已話：「不過個賠償數字就cover唔到生意損失，但賠啲錢會畀兩個女，仲會買架跑車畀老婆，等啲不法之徒追佢時，佢可以揸快車飛甩佢哋。」
獲賠50萬和解
Kenny09年入稟高等法院控告《FACE》誹謗，案件噚日終於和解收場。Kenny願意接受《FACE》喺今年5月存入法庭近50萬元款項，決定不再追究。佢認為對方有誠意道歉，正所謂得饒人處且饒人，皆大歡喜。
09年8月19日出版的《FACE》，話Kenny「扮有錢」及生意失敗，Kenny於是控告出版商FaceMagazineLtd同埋前總編輯李倩修誹謗。Kenny噚日仲講報道內容除咗佢個名外，九成都係錯。
（案件編號：HCA2062/09）
