中信証券（6030）開始招股，作為中國龍頭投行，來港發H股絕對不容有失，除咗因為係龍頭之外，佢哋仲係中資投資銀行走出去上市嘅頭炮，點能夠失禮呢？仲有喎，中信大把錢，諗唔到中信証券有咩來港上市集資嘅理由，所以華華有理由相信佢哋係被「鼓勵」上市，為以後一眾真正有需要上市集資嘅投行股鋪路。
講開又講，中信証券上星期五搞上市推介，請到大批捧場客支持，好似恒地（012）副主席林高演、東亞銀行（023）副行政總裁李民橋、西京投資主席劉央等，聽聞長和系都有代表到場，加上六大基礎投資者大手認購，所以股未招都已經圍晒飛，一眾保薦人功不可沒。
今次中信証券嘅安排行除咗中信自己，仲請來五大中資行同四間外資行幫手，聞說之前有間外資行一心諗住要喺中信証券呢單deal做到最多飛（即係搵到最多客認購），點知係配售早段做極都唔夠間中資行，呢位外資行阿頭都有些少酸溜溜，梗係啦，呢間外資行十年前喺新股方面真係好威㗎，但時代唔同，最終仲要俾人收購㖭。