梁思浩今次喺有線節目《怪談．靈異直播》嘅「死亡預告」，又做人死前嘅其中一種徵兆─「見鬼」，話說喺鬼節嗰日，佢喺深井附近嘅海灘拍一場遇溺浸死戲，深夜時分喺海面扮浮屍。思浩事前本來喺微博預告話叫大家小心浮屍出現，點知佢又「開口中」，翌日喺海灘真係出現浮屍，搞到思浩都覺得：「好邪！」
泰北遇溺有陰影
講到今次扮浮屍，思浩話本來前一晚收到劇本係話佢碌落樓梯死，點知導演嫌佢死得太舒服，開工嗰日臨時先話要改劇本，思浩話：「初初我仲笑笑口話點死都冇所謂，但原來導演想我被水浸死，上次喺泰北就差啲浸死，搞到我唔多唔少都有啲陰影，都唔知佢係咪特登，不過我見到導演要諗10幾種處理方法，我咪頂硬上，唯一希望佢天黑前俾我快啲死。」化晒死人妝嘅思浩，雖然落水嗰陣海面有暗湧，不過為咗大隊可以早做早收，佢諗都唔諗就跳落水，最後一take過搞掂。
拍完浸死之後，思浩仲向導演提議拍埋遺容嘅片段，不過因為劇組冇預備「屍袋」，思浩咪落手落腳周圍搵垃圾袋鋪上身，真係好賣力喎！